Bu, Azərbaycanın şərtlərinin, tələblərinin genişlənməsi, çoxalması anlamına gəlir
Məlum olduğu kimi Yunanıstan Ermənistana "S-300" zenit-raket kompleksləri göndərəcək. Bu komplekslər bir qədər əvvəl Ermənistan ordusuna silah-sursat veriləcəyini bəyan edən Fransa ilə əməkdaşlıq çərçivəsində tədarük ediləcək. Yunanıstan Ermənistana Rusiya istehsalı olan “S-300” zenit-raket kompleksləri ilə yanaşı, quru qoşunları üçün nəzərdə tutulan "TOR-M1" və "OSA" zenit kompleksləri də göndərəcək. Bundan başqa, son vaxtlar Fransa, Hindistan və İran kimi ölkələrin Ermənistanı davamlı silahlandırması müşahidə olunur. Yəni hazırda Azərbaycanla Ermənistan arasında sülh danışıqlarının getməsinə baxmayaraq, İrəvan bir çox istiqamətlər üzrə sürətlə silahlanır. İlkin mərhələdə Ermənistan Fransadan "SEZAR" özüyeriyən artilleriya qurğuları, daha sonra Hindistandan "Akaş" Hava Hücumundan Müdafiə (HHM) sistemlərini aldı. Hazırda isə Yunanıstanla "S-300" zenit-raket komplekslərini alınması ilə bağlı müqavilə imzalanıb. Bu, Ermənistanın sürətlə silahlanmasına bariz nümunədir. Ötən gün Prezidentin köməkçisi H.Hacıyev Ermənistanın silahlanmasından, bu ölkəyə hansı dövlətlərin silah-sursat verməsindən danışmışdı. Qeyd etmişdi ki, beynəlxalq praktikada təcavüzkar, işğalçı ölkənin sonradan aşırı silahlanmasına adətən imkan verilmir, hərbi quruculuqda müəyyən məhdudiyyətlər qoyulur.
Bakı Politoloqlar Klubunun sədri, siyasi elmlər namizədi Zaur Məmmədov Sherg.az deyib ki, Ermənistanın silahlanması yolverilməz və qəbuledilməzdir. Ona görə ki, məğlub olan ölkə hətta orduya belə malik olmamalıdır. Ekspert bildirib ki, amma Ermənistanda hazırda nəinki orduya malikdir, hətta hərbi büdcəsini ilbəil artırmaqdadır:
"Ermənistan tarixində ilk dəfə olaraq bu qədər böyük həcmdə və kütləvi şəkildə hərbi büdcəyə daxilolmaları görürük. Ayrı-ayrı dövlətlər Ermənistanı silahlandırmaqla məşğuldurlar. Azərbaycan tərəfinin Ermənistanın silahlanması ilə bağlı bəyanatları, narazılığın ifadə olunması tamamilə məntiqlidir və baş verənlərə adekvat reaksiyadır. Hesab edirəm ki, Ermənistan təcili şəkildə bu məsələyə aydınlıq gətirməlidir. Ümumiyyətlə, Naxçıvanla Azərbaycanın əsas hissəsi arasındakı 40 km.lik Qərbi Zəngəzur ərazisində, eyni zamanda Göyçə gölündən Azərbaycanın şərti sərhədlərinə qədər olan ərazidə heç bir ağır silahlar, hücum xarakterli raket sistemləri olmamalıdır. Bu ərazilərdə demilitarizasiya həyata keçirilməlidir".
Analitik vurğulayıb ki, əgər Ermənistan bu şəkildə silahlanmağa davam edərsə, Fransa, Hindistan və digər ölkələr ermənilərə silah verməyi sürdürərsə, o zaman gələn ilin əvvəlindən başlayaraq Azərbaycanın Ermənistanın demilitarizasiya məsələsi gündəmə gətiriləcək:
"Ona görə də Ermənistan yaxşı-yaxşı düşünməlidir. İrəvan anlamalıdır ki, sülh prosesinin uzanması heç də İrəvanın xeyrinə deyil və bu, Azərbaycanın şərtlərinin, tələblərinin genişlənməsi, çoxalması anlamına gəlir. Son 4 ildə Azərbaycanın davranışları və əldə etdikləri bunu dəfələrlə sübut edib".
