Böyük Britaniya husilərlə toqquşmaq istəmir, lakin Qırmızı dənizdə hücumlar davam edərsə, yenidən zərbə endiriləcək.
APA xəbər verir ki, bunu Böyük Britaniyanın Baş naziri Rişi Sunak ölkə parlamentində çıxışı zamanı deyib.
“Biz toqquşma istəmirik. Biz husilərə və onların hücumlarını mümkün edənlərə bu qanunsuz və qəbuledilməz hücumları dayandırmaq xəbərdarlığı edirik. Zəruri olarsa, Birləşmiş Krallıq yenidən özünümüdafiə üçün cavab verməkdə tərəddüd etməyəcək. Biz dayanıb gözləyə və bu hücumların cavabsız qalmasına icazə verə bilmərik”, - Sunak bildirib.
Baş nazir qarşıdakı günlərdə husilərin hücumlarına cavab olaraq yeni sanksiyaların bəyan ediləcəyini qeyd edib.
Sunak vurğulayıb ki, husilərə silah və komponentlərin tədarükünün pozulması üçün müttəfiqlərlə və tərəfdaşlarla yaxından çalışmaq lazımdır.
