Azərbaycan ədəbiyyatının simalarından olan Əlisəmid Kürün səhhətində yaranmış problemlər ictimaiyyətin diqqət mərkəzindədir.
Şairin həyat yoldaşı Mətanət Mehdiyeva Teleqraf-a açıqlamasında bildirib ki, həyat yoldaşının səhhəti ağır olaraq qalır. Onun sözlərinə görə, bu gün Əlisəmid Kürün müayinəsi üçün xəstəxanaya başqa bir həkim dəvət olunacaq. Hazırda müalicə Mərkəzi Klinik Xəstəxananın Reanimasiya şöbəsində davam etdirilir.
Qeyd edək ki, Əlisəmid Kür qaraciyər çatışmazlığından əziyyət çəkir. O, sentyabrın 15-də Respublika Diaqnostika Mərkəzinə yerləşdirilib.
Daha sonra isə özəl tibb müəssisəsindən Respublika Klinik Xəstəxanasının Reanimasiya şöbəsinə təxliyə olunub.
Şairin səhhəti ilə bağlı son məlumatı Beynəlxalq Avrasiya Mətbuat Fondunun (BAMF) prezidenti Umud Mirzəyev Sherg.az-la bölüşüb:
"Respublika Klinik Xəstəxanasında müalicəsi davam etdirilir. Hazırda müayinələr aparılır, bəzi onkoloji problemlər aşkarlanıb. Bu gün konsultasiya keçiriləcək və bundan sonra müalicə ilə bağlı yekun qərar veriləcək. Mən dünən onunla görüşdüm, vəziyyəti orta səviyyədədir. Bu gün onkoloq və digər mütəxəssislərin iştirakı ilə aparılacaq müayinələrdən sonra müalicə planı müəyyən olunacaq".
