"Bəlkə də bu yöndə atılan addımlar həbsxanalarda cəza çəkənlərin buraxılandan sonra islah olunmalarına daha çox şərait yaradar"
8 noyabr – Zəfər Gününün Azərbaycan xalqı üçün müstəsna əhəmiyyəti nəzərə alınaraq və humanizm ənənələrini davam etdirərək Azərbaycan Respublikasının Prezidenti İlham Əliyev tərəfindən amnistiya elan edilməsi təşəbbüsü irəli sürülüb. Amnistiyanın tətbiq ediləcəyi şəxslərin sayına və əhatə etdiyi cinayət məsuliyyətindən və cəzadan azad etmə institutlarının dairəsinə görə bu aktın ən böyük amnistiya olacağı ehtimal edilir. Vətən müharibəsində qazanılmış tarixi Zəfərin birinci ildönümü ilə bağlı bu Qələbənin memarı olan Azərbaycan Respublikasının Prezidenti tərəfindən Milli Məclisə təqdim edilən amnistiya aktının ümumilikdə 16 mindən çox şəxsə şamil ediləcəyi gözlənilir.
Bunlardan azadlıqdan məhrumetmə yerlərində cəza çəkən 3 mindən çox şəxsin azad ediləcəyi, habelə 3 minədək şəxsin cəzalarının çəkilməmiş hissəsinin azaldılacağı proqnozlaşdırılır. Amnistiya aktının layihəsinə əsasən, Vətən müharibəsində və Azərbaycan Respublikasının suverenliyinin və ərazi bütövlüyünün qorunması uğrunda aparılan digər döyüş əməliyyatlarında iştirak etmiş şəxslərin, habelə döyüş əməliyyatlarında həlak olmuş şəxslərin yaxın qohumlarının, Azərbaycan Respublikasının orden və medalları ilə təltif olunmuş şəxslərin, Vətən müharibəsi dövründə mülki əhaliyə qarşı hərbi təxribat nəticəsində əlil və ya həlak olmuş şəxslərin yaxın qohumlarının, habelə böyük ictimai təhlükə törətməyən cinayət törətmiş şəxslərin cinayət məsuliyyətindən azad edilməsi nəzərdə tutulur. Bununla yanaşı, layihəyə görə, ehtiyatsızlıqdan cinayət törətmiş şəxslər, böyük ictimai təhlükə törətməyən cinayət törətmiş şəxslər, cəzanın çəkilməmiş hissəsi 6 aydan az olan az ağır və ya ilk dəfə ağır cinayət törətmiş şəxslər, cəzanın sonuna 1 ildən az müddət qalmış məntəqə tipli cəzaçəkmə müəssisəsində cəza çəkən şəxslər azadlıqdan məhrumetmə cəzasının çəkilməmiş hissəsindən azad ediləcəklər. Həmçinin cərimə, ictimai işlər, islah işləri, hərbi xidmət üzrə məhdudlaşdırma, azadlığın məhdudlaşdırılması, intizam xarakterli hərbi hissədə saxlama və digər azadlıqdan məhrumetmə ilə bağlı olmayan cəzalara məhkum edilmiş şəxslərin cəzadan azad edilməsi nəzərdə tutulur. Amnistiya aktı əsasında əsas və əlavə cəzanı çəkməkdən azad edilən böyük ictimai təhlükə törətməyən və ya az ağır cinayət törətmiş şəxslərin üzərindən məhkumluğun götürülməsi gözlənilir.
Amnistiya aktı ilə bağlı hüquq üzrə fəlsəfə doktoru Əlövsət Allahverdiyev "Şərq"ə açıqlamasında Zəfər Günü ilə bağlı qəbul olunacaq Amnistiya Aktını yüksək dəyərləndirdiyini deyib. Hüquqşünas qeyd edib ki, bu cür qərarlar mütəmadi olaraq davam etdirilməlidir:
"Bilirsiniz ki, azadlıqdan məhrum olunmuş, həbsxanalarda cəza çəkən çoxsaylı insanlarımız var. Təbii ki, onların bir çoxu törətdikləri əməllərə görə peşmançılıq hissi yaşayırlar. Onlar heç bir cinayət törətmədən normal şəkildə başqa insanlar kimi yaşamaq istəyir. Düşünürəm ki, insanları həbsxanalarda saxlamaqla, həbsxanalarda ömürlərini başa vurmaqla nəyəsə nail olmaq olmaz. Azərbaycan ümumbəşəri dəyərlərə sadiq olan bir ölkədir. İnsan hüquq və azadlıqlarına daim hörmətlə yanaşan bir ölkədir. Bu baxımdan insan hüquqlarının önə çəkildiyi bir zamanda Azərbaycanın həbsxanalardan insanların buraxılması, amnistiyaya düşməsi, amnistiya aktı ilə bağlı verdiyi qərar çox müsbət dir. Hesab edirəm ki, bu sahədə proseslər mütəmadi olaraq davam etdirilməlidir. Bəlkə də bu yöndə atılan addımlar həbsxanalarda cəza çəkənlərin buraxılandan sonra islah olunmalarına daha çox şərait yaradar. Bu baxımdan düşünürəm ki, bu çox doğru qərardır".
