Gərginliklərlə keçən Moskva-İrəvan münasibətlərində Kollektiv Təhlükəsizlik Təşkilatı Sazişinin dayandırılmasından sonra yeni addım atıldı.
Sherg.az xəbər verir ki, çərşənbə günü Ermənistan Rusiyadan sərhədçilərinin İrəvandakı hava limanından çıxarılmasını rəsmi şəkildə xahiş etdiyini bildirib. Ermənistan Təhlükəsizlik Şurasının katibi Armen Qriqoryan jurnalistlərə açıqlamasında Ermənistanın bu məsələdə dəqiq mövqeyi olduğunu və bu barədə Rusiyaya rəsmi məktubla məlumat verildiyini deyib.
Ermənistanla 1992-ci ildə bağlanmış müqaviləyə əsasən, Rusiya İrəvanın Zvartnots hava limanı da daxil olmaqla, Cənubi Qafqaz ölkəsinin hər yerində böyük sərhəd mühafizə dəstələri saxlayır. Moskva tarixən Ermənistanın yaxın müttəfiqi olsa da, keçən il Azərbaycanın Qarabağı işğaldan azad etməsindən sonra Rusiya sülhməramlılarının "müdaxilə etməməsi" səbəbindən iki ölkə arasında münasibətləri korlayıb.
Ötən həftə Ermənistan parlamentinin sədri rus sərhədçilərinin Zvartnots hava limanını tərk etməsinin “doğru” olacağını qeyd edərək, “ölkəmizin sərhədlərini özümüz qoruyacağıq” demişdi. Kremlin sözçüsü Dmitri Peskov isə çərşənbə günü səhər saatlarında verdiyi açıqlamada, "Heç kim bu qərarları (sərhədçilərin potensial geri çəkilməsi ilə bağlı) rəsmi kanallar vasitəsilə onlara çatdırmayıb" deyə bildirib.
Bu açıqlama Ermənistanın Moskvanın rəhbərlik etdiyi Kollektiv Təhlükəsizlik Müqaviləsi Təşkilatında (KTMT) iştirakını dayandırdığını bildirməsindən bir həftə sonraya təsadüf edib. İrəvan ötən ilin sonunda KTMT sammitini boykot etdi, Ermənistanın baş naziri Nikol Paşinyan ölkəsinin “KTMT-nin Ermənistana qarşı 2021 və 2022-ci illər məqsədlərini yerinə yetirmədiyinə inandığını” söylədi. O, həmçinin Moskvanı ona və hökumətinə qarşı “koordinasiyalı təbliğat kampaniyası” aparmaqda ittiham edib.
