Prezident Rəcəb Tayyib Ərdoğan, AK Partiya Trabzon 8-ci Adi Qurultayında terror təşkilatının yolun sonunun gəldiyini bir daha vurğulayaraq, “Münaqişənin, zorakılığın və qeyri-sabitliyin olmadığı, terrordan azad bir Türkiyə məqsədimizə mütləq çatacağıq" deyə bildirib.
Sherg.az xəbər verir ki, Prezident Ərdoğan sözlərini belə davam edib: "Trabzonluları buradan salamlayıram. Siz də daxil olmaqla, ürəyi bizimlə döyünən bütün insanlara sevgi və ən dərin ehtiramımı göndərirəm".
31 mart seçkilərindən əvvəl Trabzona gəldiyini xatırladan prezident Ərdoğan, "Trabzon bir daha seçimini Xalq Birliyinin lehinə etdi. Sizə olan etibarımızı qırmadınız. Bu salonda bir daha deyirəm. Nə qədər ki Allah bizə ömür verəcək, son nəfəsimizə qədər Trabzona xidmət edəcəyik və çox çalışacağıq" deyə qeyd edib.
Trabzonlulara müraciət edən Ərdoğan xatırladıb ki, şəhər Yavuz Sultan Səlimi xanlığa hazırlayan və Qanuni Süleymanın doğulduğu şəhərdir.
Prezident Ərdoğan Türkiyənin terrorla mübarizədən terrordan azad ölkəyə çevriləcəyini bildirib. Ərdoğan terror təşkilatı üçün yolun sonunun gəldiyini bir daha vurğulayıb və deyib:
"Münaqişə, zorakılıq və qeyri-sabitliyin keçmişə çevrildiyi terrorsuz Türkiyə məqsədimizə ürək birliyi ilə mütləq çatacağıq. Buna nail olmaq üçün hər addımı diqqətlə düşünərək çox əhatəli siyasət həyata keçiririk. DAEŞ terror təşkilatını da məğlub etdik.
Biz imperialistlərin hiyləsinə uymayacağıq. Bu torpaqlarda nifaq salmaq istəyənlərin toruna düşməyəcəyik. Biz birik, bir yerdəyik, hamımız qardaşıq. Aramıza heç kim girməyəcək. Qədim birliyimizi heç kim poza bilməyəcək. İnşallah, terror bəlasını aradan qaldıraraq hədəfimizə daha tez çatacağıq”.
