NATO Rusiya ilə mümkün hərbi qarşıdurma vəziyyətinə dair ətraflı planlar hazırlayıb.
Sherg.az xəbər verir ki, Almaniyanın "Bild" qəzeti öz mənbələrinə istinadən bu planların “Nato Land Warfighting Concept” (NATO-nun quru müharibəsi aparmaq konsepsiyası) adlandığını yazıb.
"Bild"in məlumatına görə, konsepsiya ABŞ ordusunun mayoru Endryu Pinqreyin rəhbərliyi altında hazırlanıb.
Birinci mərhələ: raketlərə və dronlara qarşı mübarizə
Planın ilk mərhələsində NATO-nun əsas diqqəti qırıcı təyyarələr, raketlər və pilotsuz uçuş aparatları ilə mübarizəyə yönəltməsi nəzərdə tutulur.
"Bild" yazır ki, bu çərçivədə Rusiyanın Kalininqrad vilayətində yerləşən hərbi obyektlərinə zərbələr endirilməsi də planlaşdırılır. Kalininqrad Rusiyanın mühüm hərbi bölgələrindən biri hesab olunur və burada hava hücumundan müdafiə sistemləri, raket kompleksləri və digər hərbi obyektlər yerləşdirilib.
NATO-nun mümkün ssenarisinə görə, həmin sistemlərin sıradan çıxarılması Rusiyanın Alyans ölkələrinə qarşı zərbə imkanlarını azaltmağa xidmət edə bilər.
Rusiya və Belarus sərhədində “muxtar zona”
Strategiyanın ikinci elementi Rusiya və Belarusla sərhəddə “muxtar zona” yaradılmasını nəzərdə tutur.
Bu ərazidə hərbçilərin iştirakını mümkün qədər azaltmaq, onların yerinə dronların və avtonom hərbi texnikanın fəaliyyət göstərməsi planlaşdırılır.
"Bild"in yazdığına görə, pilotsuz sistemlər Rusiya hərbi qüvvələrinin hərəkətini izləyə, onların irəliləməsi halında isə hücum edə biləcək.
Söhbət yalnız havada uçan dronlardan getmir. Konsepsiyada pilotsuz yerüstü hərbi texnikadan və robotlardan istifadə də nəzərdə tutulur. Beləliklə, ən təhlükəli tapşırıqların bir hissəsinin hərbçilər əvəzinə maşınlar tərəfindən yerinə yetirilməsi planlaşdırılır.
Bu yanaşmanın Ukrayna müharibəsində əldə olunan təcrübəyə əsaslandığı qeyd olunur. Dronlar artıq döyüş meydanında kəşfiyyat, hədəflərin müəyyənləşdirilməsi, hərbi texnikanın vurulması və cəbhənin geniş ərazilərinin müşahidəsi üçün geniş istifadə edilir.
Üçüncü mərhələ: Rusiyanın dərinliklərindəki obyektlərə zərbələr
Strategiyanın üçüncü mərhələsi döyüş xəttindən xeyli uzaqda yerləşən və Rusiya ordusunun təminatını həyata keçirən obyektlərə qarşı əməliyyatları nəzərdə tutur.
Mümkün hədəflər sırasında hərbi aerodromlar, müdafiə sənayesi müəssisələri, körpülər və dəmir yolu qovşaqları göstərilir.
"Bild"in məlumatına görə, bu obyektlər Rusiya ordusunun cəbhəyə canlı qüvvə, sursat və hərbi texnika çatdırmasında mühüm rol oynayır.
Konsepsiyada həmçinin xüsusi təyinatlı qüvvələrin düşmən arxasında əməliyyatlar keçirməsi imkanından bəhs edilir. Onların əsas məqsədi mühüm hərbi obyektləri sıradan çıxarmaq ola bilər.
Bundan başqa, plana Rusiya Prezidenti Vladimir Putinə qarşı olan rusiyalıların bu cür əməliyyatlarda kömək edə biləcəyi ilə bağlı yanaşmanın da daxil edildiyi bildirilir.
NATO Rusiyanın ərazisini ələ keçirməyi planlaşdırmır
Məlumata görə, konsepsiyanın məqsədi Rusiyanın ərazisini işğal etmək deyil. Planın əsas məqsədi mümkün Rusiya hücumunun qarşısını almaq, irəliləyən Rusiya qüvvələrini dayandırmaq və onları sərhədə geri çəkməyə məcbur etməkdir.
"Bild"in yazdığına görə, NATO-nun hazırladığı bu konsepsiya xüsusilə Baltikyanı ölkələrə - Estoniya, Latviya və Litvaya mümkün Rusiya hücumu ssenarisinə hesablanıb. Bu ölkələrin hər üçü NATO üzvüdür və onlardan hər hansı birinə hücum bütün Alyans üçün böhran yaradacaq.
Qeyd edək ki, Moskva dəfələrlə Rusiyanın NATO ölkələrinə hücum etmək niyyətində olduğu barədə iddiaları rədd edib. Bild isə NATO-nun mümkün münaqişə halı üçün hazırladığı planın artıq konkret ssenariləri əhatə etdiyini yazır.
