Azərbaycanın xarici işlər naziri Ceyhun Bayramov Türkiyəyə birgünlük səfəri çərçivəsində türkiyəli həmkarı Hakan Fidanla görüşü zamanı Bakı ilə İrəvan arasında sülh prosesini müzakirə edəcək.
Bu barədə Türkiyə mətbuatı diplomatik mənbələrə istinadən məlumat yayıb.
Nazirlər ikitərəfli münasibətləri və regional məsələləri, Azərbaycan və Ermənistan arasında sülh prosesini, həmçinin Ankara ilə İrəvan arasında münasibətlərin normallaşdırılmasını müzakirə edəcəklər.
"Bundan başqa, İsrail və Fələstin də daxil olmaqla yaxın bölgələrdə cərəyan edən hadisələr də müzakirə olunacaq", - məlumatda bildirilib.
Qafqaz Strateji Araşdırmalar Mərkəzinin sədri, politoloq Hasan Oktay “Sherg.az”a söyləyib ki, Ceyhun Bayramovun Türkiyəyə səfəri regionda baş verən son hadisələrlə bağlı XİN rəhbərinin məsləhətləşmələri baxımından çox mühüm hadisədir:
“Noyabrın 10-da imzalanan razılaşmadan dörd ilə yaxın vaxt keçməsinə baxmayaraq, Azərbaycanla Ermənistan arasında razılaşmanın olmaması Putinin Bakıya səfəri çərçivəsində sülh sazişi ilə bağlı gözləntiləri təxirə saldığı görünür. Bayramovun Türkiyəyə səfəri zamanı Putinin Azərbaycana, Əliyevin əvvəlcə Qazaxıstana, sonra Özbəkistana səfərləri və bölgədəki proseslərin iki dövlətin xarici siyasətini necə formalaşdıracağı ilə bağlı məsələlər müzakirə olunacaq. Prezident Ərdoğanın Rizədəki çıxışından sonra Türkiyə ilə Azərbaycan arasında qarşıdurma yaşanması iddiası müzakirə olunacaq və tərəflər fikir mübadiləsi apararaq bu məsələyə münasibət bildirəcəklər. Regional hadisələr Türkiyə, Ermənistan və Azərbaycan arasında üçtərəfli sülh mümkün qədər tez imzalanmasa, bu, Cənubi Qafqazda sabitliyi pozan vəziyyətə çevrilə bilər. Çünki bu saziş təxirə salındığı üçün regionda maraqları olan dövlətlər müdaxilə etmək imkanı əldə edəcəklər. Ona görə də Bayramovun Türkiyəyə səfəri son dərəcə əhəmiyyətlidir”.
