Trabzonda qış yuxusundan oyanıb ac qalan ayılar Araklı Bələdiyyə sədri Hüseyn Avni Coşkun Çebinin yayla evinə giriblər.
Sherg.az xəbər verir ki, ağır qış şəraitindən sonra rayonun yüksək ərazilərində yuxudan oyanan ayılar qida tapmaq üçün Bahçecik yaylasına endi.
Araklı Bələdiyyə sədri Hüseyn Avni Coşkun Çebiyə məxsus, 1800 metr yüksəklikdə yerləşən yayla evinə girən ayılar pəncələri və dişləri ilə qapı və pəncərələri zədələyib, evdəki əşyaları dağıdaraq zərər veriblər.
Ayılar pəncərədən evə daxil olaraq, xüsusilə mətbəxdəki avadanlıqlara ziyan vurublar.
Səhər saatlarında evin yerləşdiyi əraziyə çıxan yerli sakinlər vəziyyəti görüb mobil telefonla həmin anları lentə alıblar.
Hadisə ilə bağlı danışan bələdiyyə sədrinin qohumu Yalçın Çebi deyib:
“Coşkun başkanın evinə giriblər. Buraları söküb, dağıdıblar. Ayı qardaşlara torpil də keçmir. Pəncərədən girib hər şeyi yıxıblar. Ayı da öz işini bilir. Yayda onlara ət atdığım üçün mənim evimə girmədilər.”
