Bir müddət əvvəl həbs edilən Vəkillər Kollegiyasının sabiq üzvü Adəm Məmmədov azadlığa çıxıb.
Teleqraf xəbər verir ki, o, cəzasını Penitensiar xidmətin Bakı İstintaq Təcridxanasından 9 saylı cəzaçəkmə müəssisəsində çəkib və bu gün cəzasının sonu ilə sərbəst buraxılıb.
Xatırladaq ki, Vəkillər Kollegiyasının üzvü Ceyhun Yusifovun həmkarı Adəm Məmmədov və onun qardaşı Xəyyam Məmmədova qarşı xüsusi ittiham qaydasında şikayətinə Nərimanov Rayon Məhkəməsində baxılıb.
Şikayət əsasında A. Məmmədov Cinayət Məcəlləsinin 147.2- ci (böhtan) və 148-ci (təhqir) maddəsi ilə təqsirli bilinib və 6 ay müddətə azadlıqdan məhrum edilib.
Onun qardaşı X. Məmmədov da eyni əməllərlə təqsirli bilinib və ona 6 ay müddətə islah işləri cəzası verilib.
A. Məmmədovun təsisçi və qardaşının baş redaktor olduğu saytda Ceyhun Yusifovun haqqında yalan məlumatlar yerləşdirilib.
“Vəkillər və vəkillik fəaliyyəti haqqında” Azərbaycan Respublikası Qanununun 23-cü maddəsinə görə, yalnız barəsində məhkəmənin qanuni qüvvəyə minmiş ittihamedici hökmü olduqda vəkilin vəkillik fəaliyyətinə xitam verilir.
Qeyd edək ki, Vəkillər Kollegiyası Rəyasət Heyətinin 27.01.2025-ci il tarixli qərarı ilə Adəm Məmmədovun fəaliyyəti 3 ay müddətə dayandırılmışdı.
Vəkillər Kollegiyasının avqsutun 20-də keçirilən iclasında A. Məmmədovun vəkillik fəaliyyətinə birdəfəlik xitam verilib.
