Özünü astronavt kimi təqdim edən şəxs, “kosmik gəmidə oksigen alacağı” yalanı ilə bir qadını aldadıb.
Sherg.az xəbər verir ki, Yaponiyanın şimalındakı Hokkaydo adasında yaşayan bədbəxt qadın iyul ayında sosial şəbəkədə həmin dələduzla tanış olub.
AFP-yə açıqlama verən yerli polis əməkdaşı hadisəni “romantik dələduzluq” adlandırıb.
Məlumata görə, dələduz bir neçə söhbətdən sonra yaşlı qadına “hazırda kosmosda kosmik gəmidə olduğunu, hücum altında qaldığını və oksigenə ehtiyac duyduğunu” deyib.
Sonra qadından oksigen almağa kömək etməsi üçün internet üzərindən pul köçürməsini istəyib və nəticədə təxminən 1 milyon yen (6.700 dollar) göndərilməsinə nail olub.
Yerli KİV-in xəbərinə görə, aldadılan qadın tək yaşayır. Onlayn ünsiyyət irəlilədikcə qadın həmin adama qarşı hisslər bəsləməyə başlayıb.
Dünya Bankının məlumatına əsasən, Yaponiya kiçik Monakodan sonra dünyanın ən yaşlı ikinci əhalisinə sahibdir və yaşlı insanlar tez-tez müxtəlif növ təşkilatlanmış dələduzluqların qurbanına çevrilirlər.
Bunlara ən çox rast gəlinən üsullardan biri dələduzların özlərini çətin vəziyyətdə olan ailə üzvü kimi təqdim etməsidir.
Polis isə yaşlıların sığorta haqları və ya pensiya maaşlarını ələ keçirmək məqsədilə onları bankomatlardan istifadə etməyə inandırmaq cəhdləri barədə xəbərdarlıq edib.
Turan
