Ağdamda atasının şiddətinə məruz qalan 2 yaşlı Musa hələ də xəstəxanadadır. Həyatda qalması belə möcüzə sayılan azyaşlı bu gün yaşamaq üçün mübarizəsini qalib başa vurur.
Bu barədə Teleqraf-a Ailə, Qadın və Uşaq Problemləri üzrə Dövlət Komitəsindən məlumat verilib.
Bildirilib ki, 27 avqust tarixində ağır vəziyyətdə Ağdam Rayon Mərkəzi Xəstəxanasına gətirilən Musanın vəziyyəti dərhal Ailə, Qadın və Uşaq Problemləri üzrə Dövlət Komitəsi tərəfindən də nəzarətə götürülərək, aidiyyatı qurumlarla birgə fəaliyyətə başlanılıb.
"Azyaşlının vəziyyətinin ağır olması səbəbindən onun Bakıya – Respublika Neyrocərrahiyyə Xəstəxanasına təxliyə olunmasına qərar verilib. Həkimlərin səyi nəticəsində, həyat savaşı verən azyaşlı yenidən həyata qaytarıldı.
Hazırda Musanın vəziyyəti stabildir. Hələ də xəstəxanadadır, amma təhlükəli mərhələni geridə qoyub.
Musa bəlkə də başına gələnləri unutacaq. Amma onun bədəni və ruhu uzun müddət daha çox sevgiyə, qayğıya və mərhəmətə ehtiyac duyacaq…
Qeyd edək ki, onun müalicəsi TƏBİB-in tabeliyindəki Respublika Neyrocərrahiyyə Xəstəxanasında davam etdirilir", - məlumatda qeyd olunub.
Məlumat üçün bildirək ki, avqustun 26-də Ağdamın Xındırıstan kəndində iki azyaşlı uşaq (2 və 3 yaş) valideynləri tərəfindən döyülüb. Hər iki uşaq öncə Ağdam Rayon Mərkəzi Xəstəxanasına yerləşdirilib, müayinə və müalicələrə cəlb olunublar. Uşaqlardan biri Musa Rəhimovun vəziyyəti ağır olduğundan, o Bakıya gətirilib.
Hər iki uşağın körpələr evinə yerləşdirilməsi nəzərdə tutulur.
