Marselin mərkəzində baş verən insident nəticəsində azı beş nəfər xəsarət alıb.
Trend-in yerli mətbuata istinadən verdiyi məlumata görə, yaralılardan birinin vəziyyəti ağırdır.
Hadisənin törədicisi qanuni əsaslarla Fransada yaşayan Tunis vətəndaşı olub:
"Cinayətkar saat 15:26-da polis tərəfindən zərərsizləşdirilib", – deyə prokuror qeyd edib.
Məlumata əsasən, təcavüzkar Belzans bölgəsində yerləşən oteldən ödəniş etmədiyi üçün çıxarılıb, daha sonra geri dönərək əvvəlcə otaq yoldaşına, ardınca otel müdirinə və onun oğluna hücum edib. Sonra küçədə və yaxınlıqdakı kafedə insanlara bıçaqla zərbələr endirib.
Polis əməkdaşlarının xəbərdarlığına baxmayaraq, o, silahı yerə qoymaqdan imtina edib və onlara hücum etməyə cəhd göstərib. Nəticədə polis odlu silahdan istifadə edərək hücumçunu zərərsizləşdirib.
Birinci qurban – təcavüzkarın otaq yoldaşının vəziyyəti kritik olaraq qiymətləndirilir. Otel müdiri və oğlu isə xəstəxanaya yerləşdirilib, həyatları üçün təhlükə yoxdur.
Hazırda hadisə terror aktı kimi dəyərləndirilmir.
