İki şübhəli həbs olunub
Ətraf mühitlə bağlı reportajları ilə tanınan jurnalist Hakan Tosun İstanbulun Esenyurt rayonunda evinə gedərkən hücuma məruz qalıb. Sherg.az xəbər verir ki, ağır xəsarətlər alan Tosunun beyin ölümü qeydə alınıb.
Hakan Tosunun bacısı Öznur Tosun deyib:
“Qardaşım vətəni, xalqı, torpağı üçün mübarizə aparan, çox təmiz bir insan idi. Qarışqaya belə zərər verməzdi, heç bir cinayət qeydi yox idi, tərtəmiz idi.”
50 yaşlı müstəqil jurnalist Hakan Tosun cümə gecəsi Mehmet Akif məhəlləsində 112 təcili yardım qrupları tərəfindən huşsuz vəziyyətdə tapılıb.
Həyati funksiyalarının demək olar ki, olmadığı müəyyən edilən Tosun xəstəxanaya aparılıb.
Üzərindən şəxsiyyət vəsiqəsi çıxmadığı üçün kimliyi müəyyən edilməyən Tosunun ailəsi itkin müraciəti etdikdən sonra onun Başakşehir Çam və Sakura Şəhər xəstəxanasının reanimasiya şöbəsində olduğu məlum olub. Jurnalist Fatoş Erdoğan, Tosunun yaxınlarının xəstəxana qarşısında keçirdiyi gərgin gözləməni lentə alıb.
Hakan Tosunun dostu Aslı Kahraman Eren bildirib:
“Hakan Tosun Esenyurtda Mehter küçəsində gedərkən yaxınlaşan avtomobildən enən bir neçə nəfərin hücumuna məruz qalıb və aldığı zərbələr nəticəsində ağır yaralanıb.”
Hücumdan sonra 18 və 24 yaşlarında olan iki nəfər “qəsdən yaralama” ittihamı ilə həbs edilib.
