Yaponiyada təbiət yürüşü edərkən iki qara ayının hücumuna məruz qalan Yeni Zelandiyalı qaçışçı Billi Halloran, tək bir dişləmə ilə qolunun parçalanmasından sonra ölümün bir addımlığından dönüb.
Sherg.az xəbər verir ki, Yaponiyada mütəmadi olaraq təbiət yürüşləri və qaçışları edən, hətta bölgədə keçirilən çətin ultramarafon yarışlarında iştirak edən Halloran, iki həftə əvvəl bir ayının hücumuna m’ruz qal;b.
32 yaşlı idmançı oktyabrın əvvəlində qaçış zamanı iki Asiya qara ayısı ilə üz-üzə gəldiyini deyib. “O anda başımın bəlada olduğunu anladım,” - deyə Halloran bildirib. O, yavaşca geri çəkilməyə çalışdığını, lakin ayılardan birinin üstünə doğru irəlilədiyini söyləyib.
Halloran hadisəni belə təsvir edib:
“Təxminən 60 - 70 kilo civarındaydı. Üstümə atılacağını gördüm və həqiqətən də atıdı. Üzümü qorumaq üçün qolumu qaldırdım, bir anda qolumu dişləri ilə tutdu və yerə yıxıldım. Tək dişləmədə qolum paramparça oldu.”
Ayı daha sonra onun ayağını da pəncələyib, lakin bir müddət sonra meşəyə geri çəkilib. Halloran qan içində həyat yoldaşını axtarıb və kömək istəyə-istəyə təxminən bir kilometr qaçıb.
Xəstəxanada müalicə altına alınan Halloranın qoluna metal lövhələr yerləşdirilib, bud sümüyündən götürülən greftlə dişlənən hissə bərpa olunub.
Üç əməliyyat keçirən idmançı hələ də reabilitasiya mərhələsindədir.
“Artıq əvvəlki kimi olmayacaq, amma qaçmağa davam etmək istəyirəm,” - deyə Halloran bildirib. O, ən böyük sınağının fiziki deyil, psixoloji olduğunu söyləyib.
Yaponiyada bu il ayı hücumları nəticəsində 100-dən çox insan yaralanıb, azı 7 nəfər həyatını itirib.
Bəzi hallarda ayıların marketlərə girdiyi, uşaq bağçalarının önündə dolaşdığı qeyd olunur.
Mütəxəssislərə görə, iqlim dəyişikliyi ayıların ənənəvi qida mənbələrinin azalmasına səbəb olur. Bu isə onları şəhər və yaşayış məntəqələrinə doğru itələyir.
Artan təhlükə səbəbindən Yaponiya hökuməti ayı populyasiyasını nəzarət altına almaq üçün daha sərt tədbirlər görüləcəyini açıqlayıb.
Bölgə sakinləri adətən özləri ilə zəng, yüksək səslə musiqi cihazı və ya ayı spreyi daşıyırlar. Halloran da növbəti dəfə qaçışa çıxarkən ayı spreyi götürməyi düşündüyünü deyib.
