Özbəkistanın paytaxtı Daşkənd yaxınlığındakı magistral yolda sement daşıyan avtomobilin iştirakı ilə baş verən qəza nəticəsində 7 nəfər ölüb, 5 nəfər yaralanıb.
APA xəbər verir ki, Özbəkistanın Daxili İşlər Nazirliyinin məlumatına görə, hadisə sentyabrın 7-də A-373 “Daşkənd-Oş” beynəlxalq avtomobil yolunun 93-cü kilometrliyində, Anqren şəhəri ərazisində baş verib.
“Shacman” markalı sement daşıyan avtomobilin sürücüsü idarəetməni itirib. Beləliklə yük avtomobili aşaraq dəmir yolu keçidində iki yük və beş minik avtomobilinə çırpılıb. Hadisədən sonra yanğın başlasa da tez bir zamanda söndürülüb.
Hadisə nəticəsində 7 nəfər hadisə yerindəcə ölüb. Xəsarət alan 5 nəfər həkimlər tərəfindən xəstəxanaya çatdırılıb. Digər dörd zərərçəkənə hadisə yerində yardım göstərilib. Qəzaya uğrayan avtomobillər arasında yanacaq daşıyan tankerin də olduğu bildirilir.
Hadisənin səbəblərini araşdırmaq üçün hökumət komissiyası yaradıb. Hüquq-mühafizə orqanları iki və daha çox şəxsin ölümü ilə nəticələnən yol hərəkəti qaydalarının pozulması faktı ilə bağlı cinayət işi açıb.
