Helikopteri əlləri ilə çıxardılar
Hindistan Prezidenti Droupadi Murmunun Kerala ştatına rəsmi səfəri zamanı az qala faciə baş versin. Yeni betonlanmış eniş zolağının bir hissəsi helikopterin enişindən dərhal sonra çöküb.
Sherg.az xəbər verir ki, Droupadi Murmunu daşıyan helikopter Kerala ştatının Pathanamthitta bölgəsində yerləşən Pramadam stadionunda enərkən, zolağın bir hissəsi birdən çöküb. Hadisə, Prezidentin Sabarimala məbədini ziyarət etdiyi vaxt baş verib. PTI xəbər agentliyinin məlumatına görə, helikopterin təkərləri tam bərkiməmiş betona təzyiq göstərib və zolaq torpağa doğru batıb.
Polis və yanğınsöndürənlər hadisə yerinə cəlb olunaraq helikopteri əlləri ilə itələyib çökmüş sahədən çıxarıblar. Rəsmi şəxslər bildiriblər ki, eniş zolağı gecə saatlarında tələsik şəkildə inşa olunub və beton bərkimədən istifadəyə verilib.
Rayon polis rəisinin sözlərinə görə, Prezidentin helikopteri əvvəlcə Rajiv Qandi Qapalı İdman Zalına enməli idi, lakin plan son anda dəyişdirilib və zolaq bir gecəyə hazırlanıb.
Murmunun helikopteri əslində Pamba yaxınlığındakı Nilackal bölgəsinə enməli idi, lakin pis hava şəraiti səbəbindən istiqamət Pramadama yönləndirilib.
Tam oturmamış beton helikopterin təzyiqinə dözməyib və təkərlərin toxunduğu hissələrdə çuxurlar əmələ gəlib.
Prezident Murmu hadisədən sonra quru yol ilə Pambaya yola düşüb. Helikopter isə xidmət əməkdaşları tərəfindən əllə çıxarılıb.
