19-20 oktyabr tarixlərini əhatə edən məktəbəqədər təhsil müəssisələrində pedaqoji fəaliyyətlə məşğul olan təhsilverənlərin diaqnostik qiymətləndirilməsi yekunlaşıb.
APA xəbər verir ki, bu barədə Təhsil İnstitutu məlumat yayıb.
Bildirilib ki, prosesin test imtahanı mərhələsi respublikanın müxtəlif şəhər və rayonları üzrə 28 imtahan mərkəzində təşkil olunub. Ümumilikdə diaqnostik qiymətləndirilmədə 90% davamiyyət qeydə alınıb.
20 oktyabr tarixində təşkil olunun diaqnostik qiymətləndirilmənin I seansında imtahan sistemində yaranan texniki nasazlıqla bağlı imtahan prosesində ləngimə baş verib. Nasazlıq aradan qaldırıldıqdan sonra imtahan prosesi qaydalara uyğun olaraq yekunlaşıb.
Qeyd edilib ki, cari ildə ilk dəfə təşkil olunan məktəbəqədər təhsil müəssisələrində fəaliyyət göstərən təhsilverənlərin diaqnostik qiymətləndirilməsinin məqsədi pedaqoji heyətin təlim ehtiyaclarını müəyyən edərək sertifikatlaşdırma prosesinə hazırlığı təmin etməkdir.
