Bu ilin yanvar-mart aylarında Bakıda ictimai iaşə dövriyyəsinin həcmi 399,6 milyon manat olub.
Bu barədə Bakı Şəhər Statistika İdarəsindən bildirilib.
Məlumata görə, bu, ötən ilin müvafiq dövrü ilə müqayisədə 19,2% çoxdur.
Birinci rübdə paytaxtda hüquqi şəxslərin ictimai iaşə dövriyyəsi 230,4 milyon manat olub ki, bu da ümumi dövriyyənin 57,7%-ni təşkil edir.
İqtisadçı - ekspert Asif İbrahimov “Sherg.az”a bildirib ki, bu gün Azərbaycana gələn turistlərin sayının artımı, paytaxtımızda və eləcə də regionlarda fəaliyyət göstərən iaşə müəssisələrinin fəaliyyətinə çox müsbət təsir göstərir:
“Digər ölkələrə gedən turistlər kimi Azərbaycana gələnlər də bütün yeməkləri restoranlarda yeyirlər. Bu gün iaşə müəssisələrində dövriyyənin artması da, hesab edirəm ki, Azərbaycana gələn turist sayının artımı ilə əlaqədardır. Təbii ki, yerli sakinlər də iaşə müəssisələrindən istifadə edir. Nəzərə alsaq ki, əvvəlki illərə nisbətən yerli sakinlərin restoranlara və iaşə müəssisələrinə getməsi çoxluq təşkil edir. Təbii ki, bu da ölkə iqtisadiyyatının artan inkişafından xəbər verir. Ümumiyyətlə ictimai iaşə müəssisələrinin rəhbərlikləri administrasiyaları düzgün qiymət siyasəti aparmalıdır. Yəni ikili menyu olmamalıdır. Yerli sakinlərə necə qiymət tətbiq olunursa, gələn turistlərə də eyni qiymət tətbiq olunmalıdır. Çünki ikili menyu artıq qanun pozuntusudur”.
