Bu ilin yanvar-aprel ayları ərzində Azərbaycandan 95,4 milyon ABŞ dolları dəyərində qızıl ixrac edilib.
Sherg.az İqtisadi İslahatların Təhlili və Kommunikasiya Mərkəzinin açıqladığı “İxrac İcmalı”nın aprel sayına istinadən xəbər verir ki, bu 2024-cü ilin müvafiq dövrü ilə müqayisədə 3 dəfə və ya 64 milyon ABŞ dolları çoxdur.
İqtisadçı-ekspert Asif İbrahimov “Sherg.az”a bildirib ki, qədim zamanlardan insanlar öz əlində olan aktivləri ya etibarlı olan pul vəsaitinə və ya qiymətli metallarda tutmağa üstünlük veriblər:
“Hətta dövlətlər belə öz aktivlərinin bir hissəsini qiymətli metallarda saxlamağa üstünlük verirlər. Son bir neçə ildə ən çox dəyər qazanan, qiymətli metal qızıldır. Qızıl isə artıq bahalaşaraq fantastik rekord həddinə çatıb. Bu ən çox da dünyada baş verən iqtisadi, siyasi kataklizmaların iqtisadi qeyri stabilliyin nəticəsidir ki, insanlar öz aktivlərini xüsusilə qiymətli metallarda tutmağa üstünlük verirlər. Tələbat artdığına görə dünya birjalarında qızılın qiyməti də artıb. Valyuta fonunda baxsaq, bu da öz ixracat rəqəmlərini artırmış olur. Amma kəmiyyət fonunda baxsaq belə, bu istiqamətdə də artım müşahidə olunur. Bunun səbəbi də tələbatın artmasıdır. Azərbaycanın qızıl metallarının ən çox satışını həyata keçirdiyi ölkələr İngiltərə, İsveçrə və bir sıra digər ölkələrdir. Artan rəqəmlər tək Azərbaycanda yox, qızılın hasilatını və satışını həyata keçirən bütün ölkələrdə bunu müşahidə etmək olar. Bunun xüsusi səbəbi isə qiymətlərin bahalaşmasıdır”.
