2024-cü ilin yanvar-iyun aylarında quş əti də daxil olmaqla diri çəkidə 290,3 min ton ət, 1134,1 min ton süd, 1189,1 milyon ədəd yumurta, 13,8 min ton yun, 239,5 ton barama istehsal olunub.
“APA-Economics” Dövlət Statistika Komitəsinə istinadən xəbər verir ki, 2023-cü ilin müvafiq dövrünə nisbətən ət istehsalı 1,7%, süd istehsalı 1%, yumurta istehsalı 7,4% artıb, yun istehsalı 1,6%, barama istehsalı isə 32,8% azalıb.
Qeyd edilib ki, 2024-cü il iyulun 1-i vəziyyətinə ölkə üzrə 7132,1 min baş qoyun və keçi, 2505,1 min baş iribuynuzlu mal-qara, o cümlədən 1240,1 min baş inək və camış, 3905 baş donuz mövcud olub.
İribuynuzlu mal-qaranın 49,5%-ni inək və camışlar təşkil edir. Cari ilin yanvar-iyun aylarında quşçuluq müəssisələrində diri çəkidə 45 min ton (keçən ilin yanvar-iyun aylarında 40,3 min ton) quş əti və 584,2 milyon ədəd (keçən ilin yanvar-iyun aylarında 510,4 milyon ədəd) yumurta istehsal olunub. Ümumilikdə bu müəssisələr üzrə cəmi quşların sayı 11563,3 min baş olmuş, hər yumurtlayan toyuqdan orta hesabla 127 ədəd yumurta alınıb.
İqtisadçı ekspert Xalid Kərimli "Sherg.az"a bildirib ki, Azərbaycan bazarı özünü hər zaman yumurta ilə təmin edib:
“Azərbaycana xaricdən yumurta gəlməyib. Çünki ölkənin yumurta tələbatını yumurta istehsalçılarımız broylerlərlə təmin edə bilir. Hətta tələbatımızdan 30-40 faiz artıq istehsal olunur ki, xaricdə problem olan zaman ixrac etsinlər. Yumurta bolluğunun nəticəsində may ayında qiymət ucuzlaşdı. Ət məhsulunun istehsalı isə arta bilər, lakin həm iri, həm də xırdabuynuzlu heyvanlarda saxlanma sayı aşağı düşüb. 2015-2016-cı illərdə 8.7 milyon baş heyvan saxlanılırdı, hazırda o rəqəm gəlib düşüb 7.7 milyona. Təxminən 10 faizə qədər xırdabuynuzlu heyvanların sayında azalma var. Ətə olan tələbat artıb. Eyni zamanda saxlanılan heyvanların sayı az olduğuna görə də ətin qiyməti bahalaşmaqda davam edir. Çünki ət müxtəlif ölkələrdən gətirilir. Ölkədə südün istehsalı üçün də xammallar xaricdən gəlir. İstehsalın artması yaxşıdır. Ona görə ki, qiymət artımı olmayacaq. Azərbaycanda südlərin üzərinə orqanik süd yazırlar. Ancaq çoxu süd tozundan istifadə edilərək hazırlanır. Saxlanılan heyvanların sayı artmadığına görə, ölkədə süd yığımı artmayıb. Yəni idxal edərək istehsalı artırıblar. Ölkəmizə süd məhsulları Fransa, Hollandiya, Avropa, Zellandiya, Avstraliya və digər ölkələrdən gəlir”.
