Türkiyənin Karabük bölgəsinin Yenice rayonunda, 20 mart tarixində meşə işçiləri tərəfindən yorğun və halsız vəziyyətdə tapılan bozayı balası, Kənd Təsərrüfatı və Meşə Nazirliyinin nəzdindəki Təbiəti Qoruma və Milli Parklar (DKMP) qrupları tərəfindən qoruma altına alınıb.
Sherg.az xəbər verir ki, təxminən 1,5 aylıq olduğu müəyyən edilən ayıya əvvəl Karabükdə ilkin tibbi yardım göstərilib, sonra isə Bursanın Karacabey rayonundakı Ovakorusu Celal Acar Yabanı Heyvanları Xilasetmə və Reabilitasiya Mərkəzinə aparılıb. Burada “Bulud” adı verilən balanın çəkisinin 2,7 kiloqram olduğu müəyyən edilib.
Qeyd edək ki, 12 aprel tarixində Bingöldə bir çoban, yol kənarında yenə halsız halda bir ayı balası tapıb. 1,5 aylıq olduğu müəyyən edilən və "Yağmur" adı verilən dişi bozayı, ilkin müayinə və müdaxilələrdən sonra Karacabeydəki eyni ayı sığınacağına gətirilib və baxıma götürülüb.
Sağlamlıq vəziyyətlərinin yaxşı olduğu bildirən "Bulud" və "Yağmur"a sığınacaq işçiləri tərəfindən ana nəvazişi ilə yanaşılır, baxım və qidalnmalarına böyük diqqət göstərilir.
Hazırda 73 ayının olduğu Ovakorusu Ayı Sığınacağında, ayı balaları gündə 6 dəfə laktozsuz süd, kefir, bal, qaynadılmış yumurta, qaymaq və multivitamin əlavələri ilə bəslənir.
Ayı balalarının xüsusi baxım bölməsindəki müalicələrinin 4 ay davam etməsi planlaşdırılır. Bu müddətdən sonra isə sığınacağın bağ hissəsinə köçürüləcəklər.
