İordaniyanın paytaxtı Əmmanda İranın pilotsuz təyyarəsinin İsrailə hücumu zamanı həyəcan siqnalları səslənir.
Teleqraf xəbər verir ki, bu barədə İsrail KİV məlumat yayıb.
İordaniyanın dövlət mediası ölkənin hava məkanına daxil olan bir neçə raket və dronların məhv edildiyini bildirib.
“İordaniyanın hava hücumundan müdafiə sistemləri krallığın hava məkanına daxil olan bir neçə raket və PUA-nı vurub”, - “Petra” agentliyi qeyd edib.
Xatırladaq ki, İsrail Hərbi Hava Qüvvələri iyunun 13-də səhər saatlarında İrana zərbələr endirib. Hücum zamanı ölkənin Fordo və Natantz nüvə obyektləri, eləcə də hərbi bazaları hədəfə alınıb. İranın Atom Enerjisi Təşkilatı Natanz nüvə obyektinin məhv edildiyini təsdiqləyib.
Hava əməliyyatları nəticəsində İran İslam İnqilabı Keşikçiləri Korpusunun baş komandanı general-mayor Hüseyn Salami, Silahlı Qüvvələrin Baş Qərargah rəisi general-leytenant Məhəmməd Hüseyn Baqiri, ali dini rəhbərin müşaviri Əli Şamxani, “Hatəm-əl-Ənbiya” Qərargahının rəisi Qulam Əli Rəşid və digər yüksək rütbəli şəxslər, o cümlədən üç nüvə alimi həlak olub.
İran isə bir neçə saat sonra cavab zərbələrinə başlayıb. Tehran İsrail istiqamətində 100-dən çox pilotsuz təyyarə göndərib.
