Rusiya Azərbaycana və Ermənistana sülh prosesində yardım göstərməyə hazır olduğunu bir daha təsdiqləyir. Bu barədə Rusiya XİN-in rəsmi nümayəndəsi Mariya Zaxarova bildirib. O, Azərbaycan, Rusiya və Ermənistan liderlərinin 2020-ci ildə əldə etdikləri razılaşmaların öz aktuallığını tam qoruyub saxladığını xatırladıb. Onun sözlərinə görə, Rusiya, Azərbaycan və Ermənistanın baş nazir müavinlərinin həmsədrliyi ilə müvafiq üçtərəfli işçi qrupu çərçivəsində nəqliyyat və iqtisadi kommunikasiyaların açılması istiqamətində müsbət irəliləyişlər əldə edilib.
O əlavə edib ki, biz sərhədlərin delimitasiyası və demarkasiyası sahəsində öz təcrübəmizi bölüşməyə hazırıq. Hesab edirəm ki, bu sahədə mütəxəssislərimiz postsovet məkanında ən yaxşılardan biri kimi tanınır. Bizim unikal kartoqrafik materiallarımız var, həmçinin Ermənistan-Azərbaycan münaqişəsi illərində yığılmış humanitar məsələlərin həllində də kömək edə bilərik. Ümumiyyətlə, yalnız şad olarıq. Amma bir daha deyirəm, yeni bir şey söyləməyəcəyəm. Azərbaycanlı və erməni dostlarımıza münasibətlərin normallaşması prosesini irəli aparmaqda kömək etməyə həmişə şadam.
Politoloq Aytən Qurbanova “Sherg.az”a deyib ki, Rusiya proseslərdən kənar qalmaq istəmir:
“Mariya Zaxarovanın bu açıqlaması da buna bariz nümunədir. Ona görə də, rəsmi Kreml delimitasiya və demarkasiya məsələsindən hər fürsətdə istifadə etməyə çalışaraq öz təcrübəsini paylaşmaq niyyətini ifadə edir. Beləliklə, danışıqlar prosesində Rusiyanın önəmini vurğulamağa çalışır. Düşünürəm ki, Rusiya və ya üçüncü hər hansı bir tərəf olmadan Azərbaycanın təklif etdiyi ikitərəfli format bütövlükdə prosesin uğurluluğunun əsas zəmanətidir. İstər delimitasiya və demarkasiya prosesində, istərsə də sülh danışıqlarında bu günə qədər əldə olunmuş bütün nailiyyətlər əsasən ikitərəfli format çərçivəsində aparılmış danışıqların nəticəsidir. Amma təbii ki, təcrübə mübadiləsi və kartoqrafik dəstəyin verilməsi nöqteyi-nəzərindən Rusiyanın delimitasiya və demarkasiya prosesində iştirakının mümkün olması istisna edilmir”.
