“Azərbaycan Uşaqları” İctimai Birliyinin sığınacağında səkkiz uşaq rotavirusa yoluxub.
Onlardan ikisi xəstəxanaya yerləşdirilib, altısının isə müalicəsi sığınacaqda davam etdirilir. Daha 24 uşağın virusa yoluxma riski olduğu bildirilir.
Məsələ ilə bağlı “Azərbaycan Uşaqları” İctimai Birliyinin sədri Kəmalə Ağazadə Axar.az-a açıqlamasında bildirib ki, virus ürəkbulanma, qusma, yüksək temperaturla başlayır və bəzi uşaqlarda burun qanaxması, ishal kimi əlamətlərlə müşahidə olunur.
“Hazırda vəziyyətləri orta ağır dəyərləndirilir. İki uşaq xəstəxanaya yerləşdirilib, digər altı uşaq isə həkimlərin yazdığı müalicə əsasında sığınacaqda müalicə alır. Ümumi vəziyyətləri stabilləşməyə doğru gedir”, - o qeyd edib.
Pediatr Vaqif Qarayev “Sherg.az”a açıqlamasında deyib ki, rotavirus yeni infeksiya deyil:
“İllərdir bu virus var və hər il rast gəlinir. Xüsusən uşaq kollektivlərində yoluxma sayı daha çox olur. Əsas əlamətləri yüksək qızdırma, davamlı qusma və qarında ağrılardır. Əsasən çirkli əllər və əşyalar vasitəsilə keçir. Uşaqların sıx təmasından da yoluxmaq mümkündür. Üç yaşa qədər uşaqlarda sadaladığım əlamətlər varsa, təcili həkimə müraciət olunmalıdır. Üç yaşdan yuxarı uşaqlar maye içə bilirsə, evdə müalicə etmək olar".
Ekspert əlavə edib ki, yoluxma zamanı uşaqlar çoxlu maye itirir və susuzlaşma baş verir:
"Bu sonra ciddi problemlər yarada bilir. Həmçinin üç yaşından yuxarı uşaqlar maye içə bilmirsə, onlar dərhal xəstəxanaya getməlidir. Çünki maye içə bilməyən uşaqlara sistem vasitəsilə dərman yeridilməli və xüsusi diqqət yetirilməlidir. Uşaqların əlləri tez tez yuyulmalıdır. Çirkli əşyalardan, çirkli qidalardan istifadə etmək qəti qadağandır”.
