Müxalif “Biz Oyağıq” Hərəkatı Ermənistan Milli Təhlakəsizlik Xidmətinin sabiq direktoru general Artur Vanetsyanın baş nazirliyə namizədliyini irəli sürüb.
Teleqraf xəbər verir ki, bu barədə “Hraparak” qəzeti məlumat yayıb.
Erməni nəşri yazır ki, Vanetsyanın namizədliyi ilə bağlı sabiq prezidentlər Robert Köçəryan və Serj Sərkisyan arasında fikir ayrılığı var:
“Biz Oyağıq” hərəkatının Baş nazir Nikol Paşinyana qarşı impiçment təşəbbüsü üçün ən çox ehtimal olunan namizəd “Vətən” partiyasının sədri Artur Vanetsyandır.
Serj Sərkisyanın komandası üçün Vanetsyan məqbul namizəd kimi görünür, Robert Köçəryan isə prosesin özünə şübhə ilə yanaşır. Köçəryanın komandası (deputat) İşxan Saqatelyan vasitəsilə Vanetsyana bəzi mesajlar verib ki, nəticəsi əvvəldən müəyyənləşən ümidsiz prosesə girməyə ehtiyac yoxdur.
Həmçinin məlumata görə, Vanetsyan öz namizədliyi ilə bağlı 8 deputatın imzasını toplaya bilsə, parlamentdəki müxalif fraksiyalardan 28 deputatın dəstəyini alacaq”.
“Hraprak” Ermənistan Milli Təhlükəsizlik Xidmətinin sabiq rəhbərinin Rusiyaya səfərinə də diqqət çəkib:
“Artur Vanetsyanın hazırda Moskvada olması barədə məlumat əldə etmişik. Yaxınları bizə bildiriblər ki, o, namizədliyi ilə bağlı Moskvada yaşayan qardaşı ilə məsləhətləşməyə gedib, mayın 31-də qayıdacaq. Siyasi dairələr onun səfər zamanı (Kremldə) bəzi Rusiya rəsmiləri ilə də görüşəcəyini istisna etmirlər”.
Ermənistan hökumətinə bağlı media Artur Vanetsyanı Rusiya xüsusi xidmət orqanlarına yaxşı fiqur kimi təqdim edir. Mənbələrə görə, Köçəryan və Sərkisyanın namizədliyinin cəmiyyət arasında narazılıq yaradacağını güman edən Moskva Vanetsyanın namizədliyini nəzərdən keçirir. Ötən həftə Rusiyada səfərdə olan Robert Köçəryanla Kremldə Paşinyanın impiçmenti prosesi ilə yanaşı, bu məsələnin də müzakirə olunduğu bildirilir.
