Almaniyanın prezidentinin kobud səhvə şüurlu şəkildə yol verməsi anlaşılan deyil
Cənubi Qafqaza regional turne çərçivəsində martın 30-da Ermənistana səfər edən Almaniya Prezidenti Frank-Valter Ştaynmayer rəsmi instaqram səhifəsində Azərbaycanın Qarabağ bölgəsindəki keçmiş erməni separatçılarının “bayraq” kimi istifadə etdikləri əski parçasını əks etdirən paylaşım edib.
Həmin paylaşıma bu mətn də əlavə edilib:
"Dağlıq Qarabağ bölgəsində ermənilər üstünlük təşkil edirdi. Son onilliklər ərzində orada bir neçə dəfə hərbi toqquşmalar baş verib". Almaniya Prezidentinin sosial media profilində artıq keçmişin qalığı olan qondarma rejimin bayrağının yerləşdirilməsi və onun altında yazılan mətn Azərbaycan tərəfinin ciddi narazılığına səbəb olub. İki ölkənin Prezident administrasiyaları və Xarici İşlər nazirlikləri arasında təmaslar başlayıb.
Frank Valter-Ştaynmayerin Azərbaycan Respublikasının ərazi bütövlüyünə qarşı paylaşımı ilə bağlı Almaniyanın ölkəmizdəki səfiri XİN-ə çağırılaraq, ona qarşı sərt etiraz bildirilib.
Almaniya səfiri bu paylaşımın texniki səhv olduğunu və artıq silindiyini, habelə bununla bağlı şifahi üzrxahlıq edildiyini bildirib.
Almaniya Prezidenti Administrasiyasının rəhbəri adından ünvanlanmış məktubda da baş vermiş bu hadisəyə görə üzrxahlıq ifadə olunub.
Üzürxahlıq məktubunun hər iki ölkədə mediada paylaşılması razılaşdırılıb.
Qeyd edək ki, Almaniya Prezident Administrasiyasının rəhbəri, Dövlət katibi Dörte Dinger Azərbaycan prezidentinin köməkçisi Hikmət Hacıyevə ünvanladığı məktubda postun texniki səhv üzündən dərc olunduğunu bəyan edib: “Almaniyanın Azərbaycanın ərazi bütövlüyünə dair bilinən mövqeyi ilə bağlı heç bir əhəmiyyət daşımır. Mən bu səhvə görə olduqca məyusam. Postun Azərbaycanda bəzi insanlar arasında yaratdığı yanlış təəssürata görə üzr istəyirəm”.
Xatırladaq ki, Almaniya Prezidenti sabah (bu gün) Ermənistandan Azərbaycana gəlməlidir.
Siyasi ekspert Bəybala Mirzəyev “Sherg.az"a açıqlamasında deyib ki, təcrübəli siyasətçi olan Almaniyanın prezidentinin bu cür kobud səhvə şüurlu şəkildə yol verməsi anlaşılan deyil. Bu səhvin Ştaynmayerin Bakıya gözlənilən səfərinə kölgə saldığını qeyd edən ekspert qeyd edib ki, biz də Ştaynmayerlə bir az məzələnək, onun şərəfinə hava limanında və yol kənarlarında Hitler Almaniyasının və ya keçmiş "QDR"-in (Almaniya Demokratik Respublikası) bayraqlarını, simvollarını yerləşdirək:
“Xarici İşlər Nazirliyinə (XİN) çağırılan Almaniyanın ölkəmizdəki fövqəladə və səlahiyyətli səfiri Ralf Horlemann həmin paylaşımın texniki səhv olduğunu və artıq silindiyini bildirib. Alman diplomat Azərbaycan tərəfinə şifahi üzrxahlığını da bildirib. Lakin Azərbaycan tərəfinin səfirlə olduqca sərt danışıq apardığı və Almaniyanın Azərbaycandan açıq şəkildə, rəsmi qaydada üzr istəməsini tələb etdiyi vurğulanır. Əlbəttə, bu tələbimiz haqlı tələbdir. Almaniya özünü Fransa kimi aparmamalıdır”.
Onu da qeyd edək ki, Almaniya Prezidenti Ermənistana gedən gün məhz Almaniyanın maliyyələşdirdiyi “Deutsche Welle” platformasında Azərbaycan və Ermənistan arasındakı münaqişə ilə bağlı sənədli film yayımlanıb.
Qarabağda baş verənlərin saxtalaşdırıldığı sənədli filmdə dinc azərbaycanlıların düşdükləri acınacaqlı durumu əks etdirən videogörüntülər yer alıb. Həmin kadrlardakı şəxslər Qarabağı tərk etmiş ermənilər olaraq qələmə verilib.
Açıq-aşkar ermənipərəst mövqedən çıxış edən “Deutsche Welle” Avropanın və dünyanın ictimai rəyini yanlış yönləndirmək, Cənubi Qafqazda vəziyyəti gərgin saxlamaq istəyən qüvvələrin lokal maraqlarına xidmət niyyəti güdür.
Həmin gün Ştaynmayerin rəsmi səhifəsində Almaniya Demokratik Respublikasının bayrağının deyil də, “miatsum”çuların əski parçasının peyda olmasından da görünür ki, bütün bunlar qəsdən edilib.
