Ombudsman erməni diversantları dinlədi Erməni hərbçilərinin saxlanma şəraitindən və rəftardan şikayətləri olmayıb İstənilən halda əsirlərin qarşılıqlı dəyişdirilməsi gündəlikdə olan məsələdir
Ombudsman Səbinə Əliyeva may ayının 26-da Azərbaycan dövlət sərhədinin pozulması və digər qanunsuz əməllərin törədilməsi ilə bağlı saxlanılmış iki erməni hərbçi qulluqçu - Hovagimyan Harut Yuriki və Qazaryan Karen Aşot ilə görüşüb. Ombudsman tərəfindən həmin şəxslərin müraciətləri yerində dinlənilib və saxlanma şəraitlərinə baxış keçirilib. Erməni hərbçilərinin saxlanma şəraitindən və rəftardan şikayətləri olmayıb. Yaradılmış şəraitə görə Azərbaycan dövlətinə minnətdarlıqlarını bildiriblər. Başçəkmə çərçivəsində saxlanma şəraiti - kameraların vəziyyəti, şəxsi gigiyena və sanitariya şəraiti, tibbi xidmət, qidalanma məsələləri yerində araşdırılıb.
Xatırladaq ki, Naxçıvanda xidmətdə olarkən hava şəraitindən dolayı yolu azaraq Ermənistana keçən iki əsgərimiz - Aqşin Bəbirov və Hüseyn Axundov ermənilər tərəfindən əsir götürülüb. Ermənistanda dəhşətli işgəncələrə məruz qalan əsgərlərimizə qarşı qondarma ittihamlarla cinayət işi açılıb və barələrində hökm oxunub. Bəzi ekspertlərin fikrincə, Azərbaycan tərəfinin ələ keçirdiyi erməni diversantlarla iki əsir əsgərimizin qarşılıqlı dəyişdirilməsi ehtimalı yüksəkdir.
Azərbaycan Demokratiya və İnsan Hüquqları İnstitutunun rəhbəri Əhməd Şahidov "Şərq"ə bildirib ki, mayın 26-da iki erməni əsgərin saxlanması iki əsir əsgərimizin taleyinə də aydınlıq gətirir. Ekspertin sözlərinə görə, erməni tərəfinin Azərbaycan əsgərləri ilə bağlı yaratdığı məhkəmə şousu əslində Bakıda saxlanılan erməni diversantların onlarla dəyişdirilməsi məqsədini güdürdü:
"Amma iki erməni əsgərinin sərhədimizi qanunsuz keçməsi və təxribatlar törətməyə cəhd etməsi İrəvanın planlarını alt-üst etdi. Çünki iki erməni diversant dərhal saxlanıldı. Artıq analoji bir vəziyyət yaranıb. Erməni diversantlarla iki əsir əsgərimizin dəyişdirilməsi qaçılmazdır. Xüsusi vurğulayım ki, erməni tərəfindən fərqli olaraq Azərbaycanda həbsdə olan erməni hərbçilərin saxlanma şəraiti çox normaldır. Ombudsmanın erməni hərbçilərlə görüşündən yayılan kadrlarda bu, açıq-aşkar görünür. Erməni əsgərlər görüşdə özlərini çox rahat şəkildə ifadə edirlər. Əfsuslar olsun ki, Ermənistanda saxlanılan Azərbaycan əsgərlərinə qarşı zorakılıq tətbiq edilir, işgəncələrə məruz qalırlar. Məhz ona görə də əsir əsgərlərimizi mətbuata çıxartmırlar, onlarla görüş barədə erməni mediasında heç bir məlumat getməyib. İstənilən halda əsirlərin qarşılıqlı dəyişdirilməsi gündəlikdə olan məsələdir. Düşünürəm ki, Azərbaycan-Ermənistan liderlərinin həm Brüsseldə, həm Moskvada bir araya gəlməsi, Paşinyanın Türkiyəyə səfəri tərəflər arasında kiçik də olsa etimad mühitini formalaşdırıb. Belə bir mühitdə əsirlərin dəyişdirilməsi iki tərəfin ictimaiyyətində xoş atmosfer yaradar. Düşünürəm ki, yaxın günlərdə əsirlərin dəyişdirilməsinin şahidi olacağıq. İşin sadəcə texniki tərəfi qalıb və hansısa əlavə müzakirələrə ehtiyac yoxdur".
