Təbii olaraq siyasi əlaqələr inkişaf edir, yüksəksəviyyəli təmaslar müntəzəm xarakter daşıyır, siyasi dialoq fəaldır. Yəni, iki dost, qardaş ölkə, sözün əsl mənasında, bir-birinə çox bağlıdır və beynəlxalq təşkilarlarda da daim bir-birini dəstəkləyir.
Sherg.az xəbər verir ki, bu fikirləri Azərbaycan Prezidenti İlham Əliyev Gürcüstanın Prezidenti Mixeil Kavelaşvili ilə mətbuata bəyanatında söyləyib.
Ölkələrimizi birləşdirən bir çox sərmayə layihələrinin böyük coğrafiya üçün önəmli olduğunu bir daha qeyd edən dövlət başçısı deyib: “Azərbaycan və Gürcüstanın birgə həyata keçirdiyi neft-qaz layihələri, neft-qaz kəmərləri, nəqliyyat-kommunikasiya layihələri, sözün əsl mənasında, böyük əhəmiyyət daşıyan layihələrdir”.
Politoloq Zeynal Əmrəliyev “Sherg.az”a söyləyib ki, Gürcüstan lideri Mixail Kavelaşvilinin prezident seçildikdən sonra ilk dövlət səfərini Azərbaycana etməsi Tiflis və Bakı arasında münasibətlərin yüksək səviyyədə olmasının göstəricisidir:
“Gürcüstan Azərbaycanın ən yaxın müttəfiqlərindən biridir. Həm müttəfiqlik, həm də qonşuluq münasibətlərə malik olan ölkə olaraq son zamanlar iki ölkə arasında əlaqələr daha da inkişaf edir. Gürcüstanın Azərbaycanın enerji siyasətində mühim rola malik olması əhəmiyyətli hadisədir. İki ölkənin tarixi və mədəni əlaqələri çox möhkəm və davamlıdır. Yəni Azərbaycan və Gürcüstan uzun bir tarixi yolu birlikdə keçiblər. Bu isə tək dövlətlər deyil, eyni zamanda xalqlar arasında da münasibətlərin yüksək səviyyədə olduğunun bariz nümunəsidir. Gürcüstan prezidentinin ilk səfərini Azərbaycana etməsi əlamətdar bir hadisədir və ən yaxın müttəfiq kimi rəsmi Bakını görməsinə işarədir. İki ölkə arasında əlaqələrin bu qədər yüksəlməsi Cənubi Qafqazda sülh və təhlükəsizliyin qorunması baxımından əhəmiyyətlidir. Azərbaycan həmişə Gürcüstanla birlikdə Cənubi Qafqaz platformasını daha da gücləndirməyə çalışıb. Lakin Ermənistanın 30 il davam edən işğal siyasəti və hələ də Azərbaycanla sülhə gəlməməsi səbəbindən vahid “Cənubi Qafqaz Evi” layihəsi baş tutmayıb. Azərbaycanla Gürcüstan arasında əlaqələrin inkişaf etməsi və Ermənistanın kənarda qalması sübut edir ki, sözügedən layihənin baş tutmamasının başlıca səbəbkarı rəsmi İrəvandır”.
