Mehman Əliyev: "Artıq Rusiya Ukrayna ilə bağlı bütün böyük hədəflərini kənara qoyub"
"Danışıqlar mərhələsində hər ölkə öz problemini gündəmə gətirəcək və müzakirələr gedəcək"
“Rusiyanın amansız müharibəsinə baxmayaraq, birgə səylər nəticəsində tezliklə qarşı tərəf üzərində qələbə olacaq”. Bu fikirləri Ukraynanın dövlət başçısı Volodimir Zelenski deyib. Zelenski müharibəni ən qısa vaxtda qələbə ilə bitirəcəklərini söyləyib: “Vahid Avropa istənilən diktaturadan güclüdür. Hətta belə amansız müharibə zamanı da Ukraynanın demokratik institutları qorunub saxlanılıb”. Zelenskinin “müharibə tezliklə bitəcək” bəyanatını “Şərq”ə təhlil edən “Turan” İnformasiya Agentliyinin rəhbəri, siyasi şərhçi Mehman Əliyev də hesab edir ki, Rusiya-Ukrayna savaşının tezliklə bitmə ehtimalı yüksəkdir...
- Mehman müəllim, Rusiya-Ukrayna savaşının tezliklə sona çatacağı ilə bağlı iddiaları necə dəyərləndirirsiniz?
- Mən də o cür düşünürəm. Artıq Rusiya Ukrayna ilə bağlı bütün böyük hədəflərini kənara qoyub. Ruslar indi sadəcə Donbasdan danışırlar. Luqansk demək olar ki, tamam götürülüb. Donetskdə də xeyli irəliləyiblər. Tərəflərin bölgədə üstünlüyu hardasa əlli-əlliyədir. Çox güman Donetskdə də proses bir araya yekunlaşacaq. Bununla da müharibə dayandırılacaq.
- Yəni müvəqqəti atəşkəs imzalanacaq?
- Təbii ki, burada müvəqqəti dayanmadan söhbət gedir. Bir növ Gürcüstanın Osetiya və Abxaziya problemi kimi olacaq. Yəni müharibə, döyüş əməliyyatları dayandırılır, amma ərazi problemləri qalır.
- Bəs bundan sonra hansı mərhələ başlayır?
- Bununla da yeni mərhələnin, danışıqlar prosesinin əsası qoyulur. Danışıqlar mərhələsində hər ölkə öz problemini gündəmə gətirəcək və müzakirələr gedəcək. Ukraynanın əsas istiqaməti Avropa Birliyidir. Kiyev aktiv şəkildə Aİ-yə doğru irəliləyir. Rusiya isə Qərblə münasibətləri bərpa etmək istəyir.
- Prosesin bu şəkildə bitməsi Rusiyanın qələbəsi anlamına gəlmirmi?
- Əslində Moskva da ümumi prosesin iştirakçısıdır. Rusiyanın da öz məqsədləri, hədəfləri var idi və demək olar ki, Moskva öz hədəflərinə nail olub. Yəni məsələ artıq bitmiş sayılır.
