“Armen Sarkisyanla Nikol Paşinyanın bir komandada olması mümkün olmayacaq”
“Görünən odur ki, A.Sarkisyan özünü uzun müddətdir, Ermənistan lideri kürsüsündə görmək arzusundadır”
Ermənistanın baş naziri Nikol Paşinyanın Onik Qasparyanın ordunun baş qərargah rəisi vəzifəsindən azad edilməsi barədə prezidentə göndərdiyi vəsatət Ermənistanda yeni siyasi gərginlik yaradıb. Bundan sonra prezident Armen Sarkisyanın vəsatəti geri göndərməsi, baş nazirin isə qərarından əl çəkməməsi siyasi böhranı kritik həddə çatdırıb.
Paşinyanın tərəfdarları isə vəsatəti imzalaması üçün prezidentə təzyiq göstərir. “Mənim addımım” fraksiyasından olan deputat Vaaqn Ovakimyan Armen Sarkisyana impiçment tətbiq olunacağını istisna etməyib. O, bildirib ki, indiki halda A.Sarkisyan öz səlahiyyətlərini özbaşına həyata keçirib. Bu, ölkədə sabitliyin pozulmasına gətirə və dövlət təhlükəsizliyini təhlükə altında qoya bilər:
Dünən isə Armen Sarkisyan Paşinyanın Qasparyanı vəzifəsindən kənarlaşdırılması ilə bağlı vəsatətini ikinci dəfə imzalamayıb. Beləliklə, Sarkisyan və Paşinyan arasında gərginlik davam edir.
Ermənistandakı prosesləri “Sherg.az”a şərh edən politoloq Əhməd Əlili bildirib ki, hazırda Sarkisyanın əlinə Ermənistanda aparıcı lideri olması üçün böyük fürsətlər düşüb:
“Paşinyan Armen Sarkisyana bildirdi ki, ya bu sənədi imzalamalısınız, ya da ki, özünüzü müxalifətə keçmiş elan etməlisiniz. Həmin anda Sarkisyan məsələni dəyərləndirmədi. Beləliklə, prezident və baş nazir arasında gərginlik artdı.
Bundan sonra hər ikisinin bir komandada olması mümkün olmayacaq. Görünən odur ki, Sarkisyan özünü uzun müddətdir, Ermənistan lideri kürsüsündə görmək arzusundadır.
Ən real namizədlərdən biri də elə o idi. A.Sarksiyan hazırda hesab edir ki, erməni xalqı keçmiş liderləri görmək istəmir, Paşinyanı isə məğlub biri kimi qəbul etmirlər. Ona görə də Sarkiyan özünü əsas lider kimi görür və düşünür ki, hazırda əlinə yaxşı fürsət düşüb.
Bu istiqamətdə irəliləmək və gərginlik yaratmaq, Paşinyanı uzaqlaşdırmaqla özünün Ermənistanda lider olması üçün şərait qurmaq istəyir.
O, planlarını bu istiqamatdə həyata keçirmək fikrindədir”.
