İranın regional siyasəti və ölkənin maraqlarını qoruma istiqamətində atdığı addımlar son dövrlərdə diqqət mərkəzindədir. Regionda baş verənlər, xüsusilə qonşu ölkələrlə olan münasibətlərdə İran rəsmilərinin atdığı addımlar, həm regiondakı sabitlik, həm də ölkənin uzunmüddətli strateji maraqları baxımından önəmlidir. Mövcud proseslərin fonunda Xameneinin müşaviri Zəngəzura görə Ermənistanı təhdid edib. İran vitse-prezidenti bildirib ki, ABŞ-ni Cənubi Qafqaza gətirməklə İrəvan Ermənistan - İran münasibətlərini bundan irəli gələn bütün nəticələrlə təhlükə altına qoyur.
Milli Məclisin deputatı, politoloq Rasim Musabəyov Sherg.az-a mövzu ilə bağlı açıqlama verib:
"İran prezidenti Pezeşkian və Xarici İşlər Naziri Abbas Əraqçi bildirirlər ki, İranın maraqları nəzərə alınıb. Pezeşkian Ermənistana səfər edəcək. Bu zaman bəzi açıqlamalar veriləcək. Hələlik tələsmək lazım deyil. İran narahatdır. Ora heç bir amerikalı gəlməyib. Rus hərbiçiləri isə mövqelərini qoruyurlar. Nə yol çəkilib, nə də başqa bir addım atılıb. Vaxtından əvvəl hay-haray qaldırmağa ehtiyac yoxdur".
Deputat sonda deyib ki, müəyyən danışıqlar aparıldıqdan sonra məsələlər aydınlaşacaq.
