Təəssüflər olsun ki, Azərbaycanda qara bazarda bu biznes mövcuddur
Almaniyada 24 yaşlı Azərbaycan vətəndaşı 200 min dollara böyrəyini satıb.
Ölkədə orqan transplantasiyası ilə bağlı mövcud qadağalar olduğu halda sosial şəbəkədə istər böyrəyini, istər qaraciyərini, istərsə də digər orqanlarını satanların sayı az deyil.
Baku TV-nin əməkdaşı donor olmaq istəyən şəxslə əlaqə saxlayaraq qiyməti öyrənib.
Sözügedən şəxs bildirib ki, hər altı aydan bir həkimlər tərəfindən sağlamlığı yoxlanılır. Böyrəyini isə 20-30 min manata təklif edir.
Orqan Donorluğu və Transplantasiyası üzrə Koordinasiya Mərkəzindən bildirilib ki, orqan yalnız təmənnasızlıq prinsipi əsasında bağışlana bilər.
Əks halda donorun sağlamlıq vəziyyəti orqan bağışlamağa uyğun deyilsə, yaxın qohumu olmadığı və ticarət məqsədilə həyata keçirildiyi halda qanun pozuntusu hesab olunur və qadağandır.
Məsələ ilə bağlı Daxili İşlər Nazirliyindən (DİN) bildirilib ki, sosial şəbəkədə və ya ayrı-ayrı şəxslər tərəfindən orqan satışı ilə bağlı yerləşdirilən elanların hər biri polis tərəfindən araşdırılır.
Təhlükəsizlik məsələləri üzrə ekspert Rəşad Rza "Sherg.az"a deyib ki, qadağan olunmasına baxmayaraq, orqan satışı Azərbaycanda hələ də davam edir:
“Düzdür, bəzi böyük ölkələrə baxanda bu cinayət Azərbaycanda o qədər də geniş inkişaf etməyib. Əslində donor olmaq, qanunda var. Yəni kimsə-kiməsə donor ola bilər, amma orqanların pul ilə alınıb-satılması qadağandır. Təəssüflər olsun ki, Azərbaycanda qara bazarda bu biznes mövcuddur. Onunla mübarizə aparılsa da, tam qarşısı alına bilmir. Bu Qara işdə isə əsasən uşaqlar qurban olur. Müxtəlif yollarla aldadılır və yaxud da ki, ehtiyacdan insanlar pul müqabilində satırlar. Bir aralar orqan satışı daha geniş vüsət almışdı. Əsasən də sahibsiz uşaqları oğurlayıb böyrəyini çıxarırdılar. Sonra güc strukturları bunlara qarşı mübarizəni artırdılar. İndi belə hadisələr azalıb, amma yenədə mövcuddur”.
