2025-ci ilin yanvar-may aylarında Bakı şəhəri pərakəndə ticarət dövriyyəsi ötən ilin eyni dövrü ilə müqayisədə 4,7 faiz artaraq 13 milyard 761,5 milyon manata çatıb.
Bu barədə Teleqraf-a Bakı şəhər Statistika İdarəsindən məlumat verilib.
Məlumata əsasən, bu dövrdə ticarət şəbəkəsində satılmış ərzaq məhsulları, içkilər və tütün məmulatlarının dəyəri əvvəlki ilin müvafiq ayları ilə müqayisədə 5,7 faiz artaraq 7 milyard 508,1 milyon manat təşkil edib. Qeyri-ərzaq mallarının satışı isə 3,8 faiz artaraq 6 milyard 253,4 milyon manata yüksəlib.
Pərakəndə ticarət dövriyyəsinin real ifadədə artım tempinə baxdıqda müəssisələr üzrə bu göstərici 7,5 faiz, fərdi sahibkarlar, bazar və yarmarkalarda isə 3,0 faiz olub.
İstehlak məhsullarının satış strukturuna gəldikdə, dövriyyənin 39,6 faizi hüquqi şəxs statuslu müəssisələrin, 51,6 faizi fərdi sahibkarlara məxsus ticarət obyektlərinin, 8,8 faizi isə paytaxtın əmtəə bazarlarının payına düşüb.
İqtisadçı Razi Abbasbəyli “Sherg.az”a bildirib ki, Bakıda pərakəndə ticarət dövriyyəsinin 4.7 faiz artması müxtəlif amillərlə bağlıdır:
“Rəsmi statistik məlumatlara əsasən, sözügedən dövrdə ölkədə inflyasiya səviyyəsi 2.7 faiz təşkil edib. Lakin bu müddət ərzində əməkhaqları və pensiya ödənişlərində nəzərəçarpacaq artım müşahidə olunmayıb. Pərakəndə dövriyyədəki artım əsasən mövsümi faktorlarla, xüsusilə də yay turizm dövrünün fəallaşması ilə izah oluna bilər. Eyni zamanda, nəzərə almaq lazımdır ki, Bakı şəhəri əhalinin sıx məskunlaşdığı və ticarət dövriyyəsinin əsas hissəsinin gətirildiyi bir mərkəz kimi regionlardan tədarük olunan kənd təsərrüfatı məhsullarının böyük hissəsini özündə cəmləşdirir. Lakin bu hal, bazarın genişlənməsini əhalinin real gəlirlərinin artması ilə eyniləşdirməyə əsas vermir. Əsas diqqət məhsulun bazarda dövriyyəyə daxil olan fiziki həcminin artıb-artmamasına yönəlməlidir. Məlum tədarük göstəricilərinə əsasən, bazara çıxarılan məhsulun ümumi həcmi əvvəlki illərlə müqayisədə əhəmiyyətli dərəcədə artmamış, əksinə, bəzi strateji meyvə-tərəvəz məhsulları üzrə tədarükdə azalma qeydə alınıb. Beləliklə, pərakəndə dövriyyədəki 4.7 faizlik artımın əsasən qiymət artımı ilə bağlı olduğunu demək mümkündür. Bu artım real iqtisadi inkişafın və ya əhalinin alıcılıq qabiliyyətinin yüksəlməsinin göstəricisi kimi deyil, daha çox qiymət səviyyəsindəki dəyişmələrin statistikasına əsaslanan nominal artım kimi qiymətləndirilməlidir”.
