Metal rəflər, güzgülər və şüşə səthlər internetin gizli düşmənlərindəndir
Evdə Wi-Fi siqnalının zəifləməsinə səbəb olan əsas amillərdən biri, hər gün istifadə etdiyimiz elektron cihazlardır. Sherg.az xəbər verir ki, inanılması çətin olsa da, istifadə üsulunuzu tənzimlədikdə fərqi daha aydın görə bilərsiniz.
Çox cihaz internetin yayılan 2,4 GHz tezliyinə yaxın dalğalarla işləyir ki, bu da siqnalların bir-birinə qarışmasına səbəb olur. Məsələn, mikrodalğa sobası işləyərkən Wi-Fi siqnalına ciddi təsir edir. Eyni zamanda simsiz kameralar, ağıllı hoparlörlər və televizorlar da bu qarışıqlığa qatqı verir. Evdə bir neçə cihaz eyni anda işləyirsə, bağlantının dalğalanmasının səbəbi də məhz budur.
Mətbəxdə yaşanan bağlantı problemlərinin səbəbi adətən siqnal qarışıqlığı deyil, metal səthlərdir. Soyuducu, qab yuyan maşın və ya soba kimi cihazlar siqnalları əks etdirir və routerdən çıxan dalğaların yayılmasını əngəlləyir. Buna görə modemi mətbəxdə və ya bu cihazların yaxınlığında yerləşdirmək bağlantının gücünü nəzərəçarpacaq dərəcədə azalda bilər.
Digər gizli düşmən isə ağıllı televizorlardır. Xüsusilə bir neçə cihaz eyni şəbəkəyə qoşulduqda, televizor internet axınını yavaşladır. Simsiz hoparlörlər, körpə kameraları və ya ev təhlükəsizlik sistemləri də bu trafikin içində olduqda internet sürəti təbii olaraq düşür.
Bir çoxumuzun fərqində olmadığı digər amillər LED lampalar və ucuz enerji adaptörləridir. Bu məhsullar elektromaqnit qarışıqlığı yaradır və modemdən çıxan dalğaların düzgün ötürülməsinə mane olur. Xüsusilə masa lampası və ya priz yaxınlığında yerləşən modemlər bu qarışıqlıqdan daha çox təsirlənir. Qısacası, internet sürətinizin azalmasını hiss etdikdə, dərhal modem dəyişdirmədən əvvəl ətrafı yoxlamaqda fayda var.
Ev dekorasiyası da Wi-Fi performansına təsir edir. Metal rəflər, güzgülər və şüşə səthlər siqnalı əks etdirir və routerin gücünü azaldır. Akvariumlar da dalğaları udaraq bağlantını zəiflədir. Buna görə modemi belə səthlərin yanına qoymamaq tövsiyə olunur. Bəzi hallarda isə sadəcə mebellərin yerini dəyişmək belə fərq yaradır.
Beton divarlar da internetin gizli düşmənlərindəndir. Xüsusilə köhnə binalarda qalın divarlar siqnalın keçməsini çətinləşdirir. Əgər modem zirzəmidədirsə və siz yuxarı mərtəbədə bağlantı problemi yaşayırsınızsa, bu, çox güman ki, divarların siqnalı udmasından qaynaqlanır. Belə hallarda siqnal gücləndirici istifadə etmək və ya routeri daha açıq bir yerə köçürmək həll ola bilər.
Çox insan bağlantı yavaşlayanda dərhal modemi dəyişməyi və ya provayderi günahlandırmağı üstün tutur. Halbuki, çox vaxt problem yalnız routerin yanlış yerdə durması və ya ətrafdakı bir neçə əşyanın yaratdığı parazitlə bağlı olur. Kiçik bir düzəliş daha sürətli və stabil bağlantı üçün kifayət edə bilər.
