Qərib Babayanın “Qarabağ” mahnısını oxuyanların görüntülərini paylaşdığı üçün saxlanılması ciddi siqnaldır.
Bunu erməni türkoloq Varujan Geqamyan deyib.
Onun sözlərinə görə, həbs hadisəsi bir neçə səbəbə görə təhlükəlidir:
“Birincisi, bu, ilk növbədə, söz azadlığının məhdudlaşdırılmasıdır. İkincisi, Ermənistanda Türkiyə əleyhinə gündəmin məhdudlaşdırılmasıdır. Üçüncüsü, Ermənistanda Türkiyə və Azərbaycana zidd hərəkətləri, proqramları, addımları, təşəbbüsləri qadağan etməyə çalışırlar. Bu, ilk belə hadisə deyil, məsələn, “artsax”ın (məhv olmuş terrorçu rejim – red.) xəritəsinin Milli Assambleyanın zalından çıxarılması buna nümunədir.
Sonuncusu, bu tendensiya Türkiyə-Azərbaycan müşahidə qüvvələrinin Ermənistanda yerləşdirilməsinə qədər çatacaq. Mən şişirtmirəm. Məsələn, 1918-ci il Batum müqaviləsinə əsasən türk zabitləri ermənilərin türk qoşunlarının Ermənistanda hərəkətinə mane olmamaları üçün bütün erməni stansiyalarında və yollarında yerləşdirilməli idi. Proses ona doğru gedir”.
Politoloq Elşad Mirbəşiroğlu "Sherg.az"a bildirib ki, Ermənistan Təhlükəsizlik Xidməti həbsin səbəbini belə açıqlayır ki, Azərbaycan dilinin burada istifadə olunması qadağan deyil, amma burada hər hansı düşmənçilik hisslərini formalaşdıran notlar mövcuddur. Bu, tam əsassızdır:
"Qərib Babayan "Qarabağ" mahnısının oxunduğu görüntüləri ilk yaymasına görə İrəvan məhkəməsi onun haqqında həbs-qətimkan tədbirinin seçilməsi haqqında qərar verməkdən imtina edib. Sadəcə ona münasibətdə kütləvi çıxışların edilməsi kimi bəzi məhdudiyyətlər tətbiq olunub. Bu, onu göstərir ki, özünü demokratiya adlandıran Ermənistanda ümumiyyətlə söz azadlığından heç bir əsər-əlamət yoxdur. Xüsusilə də Azərbaycan dilində Qarabağ haqqında mahnının oxunduğu görüntülərin yayılmasına görə şəxs təqiblərə məruz qalırsa, bu, Ermənistan cəmiyyətinin nə dərəcədə aşındığını və hakimiyyətin isə "cılız xarakterli" olduğunu göstərir. Ümumiyyətlə rəsmi İrəvan Azərbaycanın ərazi bütövlüyünü tanıdığını səmimiyyətdən çox uzaq olaraq bildirir. Çünki Paşinyan dəfələrlə qeyd edib ki, Azərbaycanın sərhədləri 86.6 min kvadratkilometr çərçivəsindədir".
Politoloq əlavə edib ki, bununla Ermənistan sülh prosesində də saxtakar olduğunu bəyan edir:
"Ən azından bu istiqamətdə istənilən cəhdin qarşısı alına bilərdi. İrəvan nümayiş etdirə bilərdi ki, həqiqətən də, Azərbaycanın ərazi bütövlüyünü tanıyır. Biz görürük ki, bu, heç də belə deyil. Ümumiyyətlə bütün bunlar Ermənistanla gələcək təmaslarda çox ehtiyatlı olmağın vacibliyini göstərir. Üstəlik, gələcəkdə Azərbaycana qarşı təxribatlar törədəcəklərinə işarə edir. Bu mənada diqqətli olub qabaqlayıcı addımlar atmaq çox vacibdir. Azərbaycan mediası bu məsələ ilə bağlı geniş təhlillər apararsa və ictimai münasibət sərgilənərsə, Ermənistana təsirli cavab olar".
