"Ölkəmizdə koronavirusla bağlı fövqəladə vəziyyət elan edilməsinə ehtiyac yoxdur".
Bunu "Sherg.az"a açıqlamasında Demokratik Azərbaycan Dünyası Partiyasının (DADP) sədri Əlisahib Hüseynov deyib.
Partiya sədri bildirib ki, bəzi siyasilərimiz və ekspertlərimiz təklif edirlər ki, İspaniyada və ABŞ-da koronavirusla mübarizə məqsədilə fövqəladə vəziyyət elan olunduğu kimi bizim ölkəmizdə də fövqəladə vəziyyət elan edilsin:
"Zənnimizcə, Azərbaycanda belə bir addım atmağa ehtiyac yoxdur. Tramp ABŞ-ın bütün ştatlarında fövqəladə vəziyyət elan edə bilər. Və bunun üçün onun kifayət qədər əsası da var. Çünki iddialara görə bu virusun həm yaradıcısı, həm də dünyada yayılmasının əsas səbəbkarlarından biri və birincisi ABŞ-ın özüdür. Eləcə də Trampın özü də bu işdə məsuliyyət daşıyır. Çünki öldürücü viruslarla bağlı laborator təcrübələrin aparılmasına məhz onun özü tərəfindən icazə verilib. Lakin sonradan həmin elmi-praktik təcrübələrlə bağlı situasiya nəzarətdən çıxıb. ABŞ prezidenti bundan sonra baş verə biləcək daha böyük fəsadların qarşısını almaq üçün hərəkətə keçib və fövqəladə vəziyyətin tətbiqi ilə bağlı qərarı məhz bu məqsədlə verib. Amma sözügedən koronavirus epidemiyası Azərbaycanda və dünyanın bir sıra başqa ölkələrində kritik həddə - pandemiya mərhələsinə çatmayacaq. Çünki bu virus növü konkret olaraq bir neçə ölkə, bir neçə iqlim şəraiti və bir neçə etnos üçün nəzərdə tutulub".
Ekspertin fikrincə, Azərbaycan, Rusiya, Türkiyə, Gürcüstan, Ukrayna və s. ölkələr isə bu kateqoriyaların heç birinə daxil deyil:
"Odur ki, ifrata varmaq və əhalidə panik əhval-ruhiyyə yaratmağa da ehtiyac yoxdur. Onsuz da Azərbaycan hökuməti koronavirus məsələsi dünyada yayılmağa başladığı ilk günlərdən əhalini epidemiyadan qorumaq məqsədilə hərəkətə keçib. Lazımi bütün addımları atılmaqdadır. Nazirlər Kabineti tərəfindən müvafiq komissiya da yaradılıb və xüsusi Fəaliyyət Planı hazırlanıb. Bütün sərhəd-keçid məntəqələrində, hava limanlarında, vətəndaşların sıx toplaşdığı məkanlarda sözügedən virusa yoluxma hallarının qarşısının vaxtında alınması üçün önləyici tədbirlər görülür. Hesab edirəm ki, hazırda bu istiqamətdə görülən işlər qənaətbəxşdir. Azərbaycanda koronavirusla bağlı vəziyyət ABŞ-da, , İspaniyada, İtaliyada və ya İrandakı kimi kritik deyil".
