Ermənistan yenidən təxribata əl atıb.
Müdafiə Nazirliyindən verilən məlumata görə avqustun 16-sı saat 23:25-də Ermənistan silahlı qüvvələrinin bölmələri Basarkeçər rayonunun Yuxarı Şorca yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun Yellicə yaşayış məntəqəsi istiqamətində yerləşən mövqelərini atıcı silahlardan atəşə tutub.
Son günlər ard-arda həyata keçirilən erməni təxribatları ilə düşmən tərəfi öz məkrli niyyətlərini bir daha nümayiş etdirir.
Sözügedən təxribatları şərh edən ehtiyatda olan polkovnik, hərbi ekspert Elxan Qəniyev "Sherg.az"a açıqlamasında bildirib ki, Ermənistan tərəfi həmişəki oyunları ilə Laçın yolunu açmağa çalışır:
"Onlar yolu açmaq üçün dünya birliyinə müraciət etdilər. Bildirdilər ki, Laçın dəhlizi ilə bağlı məsələ qaldırılsın və Azərbaycana qarşı sanksiyalar tətbiq olunsun. BMT bunu qəbul etsə, Laçın yolunu açmağa məcbur edəcəkdilər. Onlar yolu açmaq üçün hər işə əl atmağa çalışacaqlar. Ancaq bizim də məqsədimiz bəllidir. Ali Baş Komandan İlham Əliyev çıxışlarında qeyd edir ki, dediyimiz sözün üzərində durmuşuq və oradan tırlar buraxılmayacaq. Bu yaxınlarda Ermənistanın diversant qrupu torpaqlarımıza keçməyə cəhd edib. Hətta bir nəfər kəşfiyyatçı silahlı qüvvələrimiz tərəfindən tutulub. Bütün təxribatlar, maşınların gəlməsi və müəyyən yerlərə şikayət etmələrinin əsas səbəbi baş qatmaqdır. Ermənistan yenidən qüvvələrini artırmaqla Şuşa və Hadrutu ələ keçirmək istəyir. Sonra isə məqsədləri bu iki ərazini Ermənistana birləşdirməkdir. Ancaq buna nail olmayacaqlar. Ali Baş Komandan, Azərbaycan ordusunun əsgərləri və zabitləri bunun qarşısını alacaq. Sərhəddə, Qarabağda onların qoşunlarını və silahlarını harada yığdıqlarını bilirik. Lazım gəlsə, bütün PUA-ları qaldıracağıq. Nə olur-olsun qələbə bizimlədir".
