Ermənistan üzərində ABŞ və Rusiya rəqabəti regionda ümumi təhlükəsizliyə mənfi təsir edir
ABŞ Mərkəzi Kəşfiyyat İdarəsinin direktoru Uilyam Börnsün İrəvana səfərindən bir-iki gün sonra Rusiya Xarici Kəşfiyyat Xidmətinin rəhbəri Sergey Narışkin də Ermənistan paytaxtına yollanıb. Rəsmi məlumata görə, iyulun 18-də Narışkini Ermənistanın Baş naziri Nikol Paşinyan qəbul edib.
Onların beynəlxalq və regional təhlükəsizlik, habelə Cənubi Qafqazdakı vəziyyəti müzakirə etdikləri deyilir. Narışkinin İrəvanda Paşinyandan başqa daha kimlərlə görüşməsi barədə məlumat verilməyib. Rusiya Xarici Kəşfiyyat Xidmətinin rəsmi saytında da Narışkinin səfəri barədə məlumat yoxdur. Ekspertlərin diqqət çəkdiyi əsas məqam çox az hallarda xarici səfərlər edən Sergey Narışkinin amerikalı kəşfiyyat rəhbərinin səfərindən dərhal sonra İrəvana getməsidir. Börns ötən həftə Nikol Paşinyan və Təhlükəsizlik Şurasının katibi Armen Qriqoryanla görüşmüşdü. ABŞ tərəfi də Uilyam Börnsün səfəri barədə heç bir açıqlama verməmişdi.
Politoloq Məhəmməd Əsədullazadə “Şərq”ə bildirib ki, Ermənistana əvvəlcə Amerika, ardınca Rusiya baş kəşfiyyatçısının səfəri çox diqqətçəkən məsələdir. Analitik vurğulayıb ki, Ermənistanın Türkiyə ilə danışıqları və müəyyən dərəcədə əldə edilmiş nəticələr, həmçinin ABŞ biolabaratoriyalarının Rusiya tərəfindən bağlanması tələbi Vaşinqtonun Ermənistana diqqətini artırıb:
“Ermənistan üzərində ABŞ və Rusiya rəqabəti regionda ümumi təhlükəsizliyə mənfi təsir edir. 30 ildir məhz Ermənistan amilinə görə regionda deastiblizasiya hökm sürür. Regionda sülhün əldə edilməsi Ermənistanın siyasi iradəsindən asılıdır. Məncə, ABŞ Mərkəzi Kəşfiyyat idarəsi sədrinin Ermənistan səfəri bir neçə amilə söykənir. Vaşinqton Ermənistanı Rusiyanın təsirindən çıxartmaq üçün ilk növbədə Türkiyə ilə əlaqələrin normallaşmasına dəstək verir. Lakin Türkiyə ilə normallaşma Paşinyan iqtidarına qarşı sui-qəsdin təşkil olunması ilə nəticələnə bilər. Görünür, Amerikanın baş kəşfiyyatçısı Rusiyadan gələ biləcək təhlükələri Paşinyanın diqqətinə çatdırıb. Ağ Ev Paşinyana təhlükəsizlik zəmanəti verə biləcəyini deyib. Ermənistan daxilində siyasi proseslərdə qeyri-müəyyənlik var.
Müxalifət parlamenti boykot edir. Bu istiqamətdə Qərbin Paşinyana tam dəstəyi çox önəmlidir. Rusiya Xarici Kəşfiyyat İdarəsinin sədri isə ABŞ kəşfiyyat rəisinin səfərindən duyulan narahatlığı İrəvan hökumətinin diqqətinə çatdırmaq məqsədi ilə Ermənistana səfər edib”.
