Ermənistan KTMT üzvü olan dövlətlərin parlament komitə sədrlərinin fevralın 7-də Moskvada keçiriləcək iclasında iştirak etməyəcək. Bu barədə Ermənistan parlamentinin spikeri Alen Simonyanın mətbuat katibi Movses Arutyunyan məlumat yayıb.
Arutyunyan jurnalistlərə bildirib ki, Ermənistan tərəfi KTMT-yə üzv ölkələrin parlament komitələri sədrlərinin görüşündə iştirak etməyəcək.
Cross Media Təhlil Mərkəzinin analitiki, siyasi şərhçi Mübariz Göyüşlü “Sherg.az”a bildirib ki, Ermənistan Kollektiv Təhlükəsizlik Müqaviləsi (KTMT) və Avrasiya İqtisadi Şurası ilə bağlı mövqeyini açıq şəkildə bəlli etməlidir:
“Ermənistan söz oyunu və vaxtı uzatmaqla doğru mövqe ortaya qoymur. Həmçinin Paşinyan hakimiyyəti bir tərəfdən Qərblə, xüsusilə ABŞ və Avropa İttifaqı ilə strateji tərəfdaşlığa can atır, digər tərəfdən isə Rusiyanın dominantlıq etdiyi KTMT və Aİİ-də formal olaraq qalmaqda davam edir. Ümumiyyətlə Ermənistan Amerikayla strateji tərəfdaşlıq haqqında saziş imzalayıb, Avropa İttifaqı ilə münasibətləri sıxlaşdırmağa çalışırsa, Rusiyanın hakim olduğu təşkilatlardan çıxdığını elan etməlidir. Təşkilatda fəaliyyətimi dondururam və yaxud iclaslarda iştirak etməyəcəm kimi yanaşmalar anlaşılmaz vəziyyət yaradır. Ermənistanın Baş nazirindən və parlament sədrindən belə şeylər görmək təbii haldır. Çünki Paşinyan və onun komandası qeyri-ciddi siyasətçilər kimi tanınır. Onlar təşkilatda fəaliyyəti dondururuq və iclaslara qatılmırıq deməklə qeyri-ciddi addımlar atırlar. Ermənistanın mövqeyindəki qeyri-müəyyənlik, daxili siyasi sabitsizlik və xarici siyasətdə balanslaşdırma cəhdləri də bununla əlaqədardır”.
