Baş verən faciə İsrailin qələbəsini deyil, onun beynəlxalq izolyasiyasını gətirəcək
"İsrailin Qəzza zolağında HƏMAS radikal silahlı təşkilatına qarşı apardığı müharibə bu təşkilatın zəifləməsinə yox, güclənməsinə gətirib çıxardı".
Bunu "Sherg.az"a açıqlamasında politoloq Məhəmməd Əsədullazadə deyib.
Ekspert bildirib ki, HƏMAS-a qarşı yalnız yumşaq güclə, diplomatik yolla qalib gəlmək olar:
"Həmas təşkilatına körfəz ərəb ölkələri, Türkiyə və İran ciddi dəstək verir. Ona görə də Qəzza zolağında İsrail ordusu HƏMAS-a qalib gələ bilmir. HƏMAS sıradan təşkilat deyil. İsrail hökuməti səhv hesablamalar apararaq Qəzzada hərbi əməliyyatlara getdi. İsrail 4 şəxsin girov götürülməsi müqabilində 200 mülki insanı öldürdü, 600-dən artıq insanı yaraladı. Baş verən bu faciə İsrailin qələbəsini deyil, onun beynəlxalq izolyasiyasını gətirəcək. Nəticədə Fələstin dövlətinin yaradılması ilə nəticələnək. Beynəlxalq siyasi konyuktura Fələstinin bir dövlət kimi tanınmasını şərtləndirir. İsrail hakimiyyəti artıq Fələstin müstəqil dövlətinin yaradılmasının fərqindədir. Məhz Qəzzada İsrail müharibə ilə öz strateji planlarına nail ola bilmədi".
Analitikə görə, İsrail Türkiyə ilə qarşı-qarşıya gəlməyə çalışır:
"Suriyanın şimalında PKK-YPG terror təşkilatına dəstək verir. İsrail "kvazidövlətdir" və onun Türkiyə kimi böyük bir ölkə ilə siyasi toqquşması öz əleyhinə işləyər. İsrail müharibə strategiyasını dayandırıb, sülh yolunu seçərsə, ABŞ-nin müdafiəsinə ehtiyac qalmaz. Artıq Baş nazir Benyamin Netanyahu müharibə cinayətkarı kimi qəbul edilir. Azərbaycan da bir müddətdən sonra Fələstini müstəqil dövlət kimi tanıyacaq. Fələstində Azərbaycan səfirliyi və Bakıda Fələstin səfirliyi fəaliyyət göstərir. Azərbaycan Fələstinə daima humanitar yardımlar edir. Müstəqil Fələstin dövlətinin yaradılması bu muharibənin qurtarması üçün əsas prosesdir".
