İyunun 26-da Azərbaycan Respublikasının Prezidenti İlham Əliyev Göygöl, Kəlbəcər və Laçın rayonlarına səfər edib. Ölkə başçısı Kəlbəcər rayonuna səfəri çərçivəsində komando hərbi hissəsinə döyüş bayrağının verilməsinə həsr olunmuş təntənəli mərasimdə çıxış edib. Prezident İlham Əliyev çıxışı zamanı bildirib ki, Ermənistanla sərhəddə bizim mövqelərimiz daha da möhkəmlənəcək:
“Əgər Ermənistan sərhədlərin müəyyən edilməsi işində yenə də öz köhnə taktikasına qapılsa, vaxt uzatmağa çalışsa, nəticədə özü peşman olacaq. Biz Ermənistanda baş qaldıran revanşist qüvvələrin hərəkətlərinə diqqətlə baxırıq. Onlar da bunu bilsinlər. Bax, o dağın başında mənim sözlərim yazılıb: “Dəmir yumruq” yerindədir, bunu heç kim unutmasın”.
“Vətən müharibəsində Ermənistanı məğlub etməyimiz onlar üçün dərs olmalıdır. Onlar hesab edirdilər ki, orduları məğlubedilməzdir və öz orduları haqqında olmayan şayiələri yayırdılar. Biz göstərdik ki, onlar Azərbaycan Ordusu qarşısında duruş gətirə bilməzlər. Onlar bəyan edirdilər ki, Azərbaycan öz torpaqlarını heç vaxt silahlı yollarla ala bilməz. Çünki həm qurulmuş istehkamlar, həm 30 il ərzində mühəndislik işlərinin aparılması, həm də ki, bu bölgənin coğrafiyası onlar üçün çox əlverişli idi. Biz bu mifi də dağıtdıq və göstərdik ki, güclü iradə olan yerdə, xalq-iqtidar birliyi olan yerdə, hərbçilərin vətənpərvərliyi olan yerdə heç kim bizim qabağımızda dura bilməz. Əgər yenə də Ermənistanda revanşist qüvvələr baş qaldırsa, bilməlidirlər ki, onları nələr gözləyir”, - Prezident İlham Əliyev qeyd edib.
Vəziyyəti “Sherg.az”a şərh edən sabiq XİN başçısı Tofiq Zülfüqarov bildirib ki, Ermənistanın yerinə yetirməli olduğu öhdəliklər var:
“10 noyabr bəyanatı Ermənistan üçün bir növ kapitulyasiya aktı idi. Orada məğlub olan tərəf – Ermənistan həm bizim qarşımızda, həm də vasitəçi Rusiyanın qarşısında xeyli öhdəliklər götürüb. İl yarımdan çox müddətin keçməsinə rəğmən, bəzi maddələr həyata keçirilmir”.
T.Zülfüqarovun sözlərinə görə, Ermənistan öz üzərinə düşənləri etməkdən boyun qaçırır:
“Təbii ki, bu qəbul edilməzdir. Bu baxımdan Azərbaycan vəziyyəti nəzərə alaraq tələb edir ki, sözügedən öhdəliklər həyata keçirilsin. Bu real və adekvat bir siyasətdir. Çünki ermənilər bir çox hallarda, xüsusilə də Qarabağ məsələsində köhnə siyasəti həyata keçirmək niyyətindədirlər. Verilən bəyanat Azərbaycanın Ermənistana ciddi xəbərdalığıdır”.
