“Ermənistan hökuməti mətbuat xidməti İranda səfərdə olan Baş Nazir Nikol Paşinyanın İranın yeni seçilmiş prezidenti İbrahim Rəisi ilə görüşü haqqında məlumat yayıb. Məlumatda deyilir ki, Baş Nazir İran prezidenti ilə İran-Ermənistan münasibətlərində mövcud olan geniş əhatəli məsələləri müzakirə edib”.
Bu sözləri BDU-nun professoru, politoloq Əlimusa İbrahimov deyib. O, daha ətraflı “Sherg.az”a danışdı:
“Sonra mətbuat xidməti həmin məsələlərin nədən ibarət olduğunu sadalayıb - Ticarət-iqtisadi əlaqələrin möhkəmləndirilməsi, Mehri Azad İqtisadi Zonasının fəaliyyəti, İranla Avrasiya İqtisadi Şurasının əlaqələri, regional kommunikasiya xətlərinin qurulması, Fars körfəzindən Qara Dənizə nəqliyyat və kabel əlaqəsinin çəkilməsi və inkişaf etdirilməsi. Həqiqətən, çox geniş əhatəyə malik məsələlərdir. Amma mənə qaranlıq qalan odur ki, elə Ermənistan hökuməti mətbuat xidmətinin verilən məlumata əlavə olaraq təqdim etdiyi və sonra geri götürdüyü videoda İbrahim Rəisi ilə Ermənistan nümayəndə heyətinin görüşünün cəmi iki dəqiqə sürdüyü göstərilir. Görüşün iki dəqiqə, hətta daha az çəkməsi həqiqətə uyğundur. Çünki andiçmə mərasiminin qızğın vaxtında İran Prezidentinin Paşinyana iki dəqiqədən artıq vaxt sərf etməsi mümkün deyi. Çünki andiçmə mərasimində iştirak edən dövlət rəhbərlərinə 10-20 dəqiqə vaxt sərf etmək bir neçə gün qonaq qəbul etməyə bərabər olardı. İki dəqiqəyə bu qədər məsələlərin müzakirə olunması isə lap fantastikadır. Görünür, Baş nazir köhnə vərdişini – mətbuat vasitəsi ilə ictimaiyyəti manipulyasiya etmək adətini yenidən işə salıb. Yəni o, hakimiyyətinin ilk dönəmindəki səhvlərdən nəticə çıxarmayıb”.
