Donald Tramp ABŞ-nin Beynəlxalq İnkişaf Agentliyini (USAID) tənqid edib, onun zəif idarə olunduğunu bildirib.
Bu barədə ABŞ Prezidenti jurnalistlərə deyib.
“USAID radikal dəlilər tərəfindən idarə olunur və biz onları oradan çıxarırıq, sonra qərar verəcəyik”, - Tramp bildirib
Qeyd edək ki, ABŞ Beynəlxalq İnkişaf Agentliyinin (USAID) internet saytı Donald Tramp administrasiyasının yardım proqramlarını dondurması fonunda fəaliyyətini dayandırıb.
Sayt heç bir izahat verilmədən şənbə günü, fevralın 1-də ləğv edilib.
Konqresdəki demokratlar Trampın USAID-i müstəqil agentlik kimi dayandırıb Dövlət Departamentinə ötürə biləcəyindən narahatdırlar. Onlar israr edirlər ki, respublikaçıların agentliyi dağıtmaq üçün qanuni səlahiyyəti yoxdur. Kanal qeyd edir ki, agentlik Konqres tərəfindən maliyyələşdirilir və onun işi milli təhlükəsizlik üçün həyati əhəmiyyət kəsb edir.
USAID-in X sosial media hesabı da artıq əlçatan deyil. Agentliyin səhifəsində "Bu hesab mövcud deyil" deyilir.
Politoloq İlyas Hüseynov "Sherg.az"a deyib ki, USAİD öz destruktiv fəaliyyəti ilə hər zaman seçilib:
"Bu qurum ayrı-ayrı coğrafiyalarda sabitliyə, sülhə və təhlükəsizliyə təhdid törədib. Həmçinin həmişə öz maraqlarını təmin etməyə çalışıb. ABŞ Prezidentinin, eyni zamanda onun innovativ və texnologiya üzrə mühüm silahdaşı İlon Maskın USAİD-i kəskin şəkildə tənqid etməsi kifayət qədər əsaslıdır. Hətta sözügedən agentliyin ləğvi məsələsinə də baxıla bilər. Digər tərəfdən Cənubi Qafqaza nəzərən USAİD hər zaman öz məkrli planları ilə yadda qalıb. Üstəlik, Ermənistanı birtərəfli qaydada dəstəkləməsi, müxtəlif demokratiya institutlarının və vətəndaş cəmiyyətinin inkişaf etdirilməsi adı altında ayrılan pullar rügionda sülhün imzalanmasına əngəl yaradıb. Odur ki, USAİD ilə bağlı Azərbaycanda da sərt mövqe formalaşıb. USAİD-in rəhbəri Samanta Pauerin və onun müavininin Ermənistana səfərini xatırlayırıq. Elə həmin vaxt da Azərbaycan bu təşkilat Azərbaycanı tənqid etmişdi və hədəf obyektinə çevirmişdi".
Politoloq vurğulayıb ki, USAİD-in köklü surətdə ləğvi bir daha bu cür mexanizmlərdən və siyasi texnologiyalardan ayrı-ayrı geosiyasi məqsədlər üçün istifadə olunmasına son qoyulması yolunda mütərəqqi addım olacaq:
"Eyni zamanda demokratların hakimiyyəti ilə müqayisədə respublikaçıların, o cümlədən Trampın ictimai-siyasi sferada nüfuzunu bir qədər də artıracaq".
