Ölkəmizdə sosial təminat sistemi ilə əhatə olunan əhali kateqoriyalarından biri də gözdən əlilliyi olan şəxslərdir. Azərbaycan Respublikasının Prezidenti cənab İlham Əliyevin əlilliyi olan şəxslərə xüsusi qayğısı gözdən əlilliyi olan vətəndaşların da sosial təminatının yaxşılaşdırılmasında mühüm addımların atılmasına imkan verib.
Modern.az xəbər verir ki, bu təbəqədən olan şəxslərin mənzillə təminatı proqramının davamı kimi, son illərdə onlar üçün Bakının Nərimanov rayonunda 132 mənzildən ibarət yaşayış binası tikilərək istifadə verilib. Binanın açılışında Prezident İlham Əliyev və xanımı Mehriban Əliyeva iştirak ediblər.
Heydər Əliyev Fondunun müvafiq layihəsi çərçivəsində respublikamızın ayrı-ayrı bölgələrində yaradılan Regional İnformasiya Mərkəzləri gözdən əlilliyi olanların və görmə qabiliyyəti zəif insanların informasiya-kommunikasiya texnologiyalarından istifadə imkanlarına malik olmasında önəmli rol oynayır. Bakının Zabrat qəsəbəsində istifadəyə verilən Yetkinlik yaşına çatmamış görmə imkanı məhdud şəxslər üçün Bərpa Mərkəzi isə reabilitasiya yönümlü sosial xidmətlərin təşkilində mühüm əhəmiyyət kəsb edir.
Hazırda Əmək və Əhalinin Sosial Müdafiəsi Nazirliyi tərəfindən 8,5 min gözdən əlilliyi olan şəxs əmək pensiyası ilə təmin olunur. Həmin şəxslərə ödənilən əmək pensiyasının orta aylıq məbləği 300 manata yaxındır. Pensiya almaq hüququ olmayanlara aylıq sosial müavinət verilir. Sosial müavinət alan ümumi səbəblərdən I qrup gözdən əlilliyi olanlara bu müavinətlə yanaşı, Azərbaycan Respublikası Prezidentinin aylıq təqaüdü də ödənilir. Bununla yanaşı, pensiya qanunvericiliyində I qrup əliliyi olanlar (o cümlədən gözən əlilliyi olanlar) üçün tələb olunan sığorta stajı ilə bağlı, habelə pensiyanın hesablanmasında güzəştlər mövcuddur.
Nazirlik yanında Dövlət Məşğulluq Xidməti tərəfindən cari ilin ötən dövründə 48 nəfər gözdən əlilliyi olan şəxs üçün peşə hazırlığı kursları təşkil edilib. Nazirlik yanında Dövlət Sosial Müdafiə Fondunun 1 saylı Sağlamlıq imkanları məhdud gənclər üçün Peşə Reabilitasiya Mərkəzinə istifadəyə verildiyi vaxtdan (2013-cü ilin dekabr ayı) indiyədək 1540 nəfər gənc qəbul olunub ki, onlardan bir qismi də görmə imkanı məhdud şəxslər olub. Nazirliyin sifarişləri əsasında icra olunan layihələr çərçivəsində görmə imkanları məhdud şəxslərin də reabilitasiya məqsədli sosial xidmətlərlə təminatı üçün müvafiq işlər aparılır.
