Bir çox insanlar gecə saatlarında yemək yeməyi vərdiş edib. Lakin bu, olduqca ziyanlı vərdişdir. Tək ona görə deyil ki, kökəlməyə səbəb olur.
Alimlər gecə yeməyini qəti yeməməyi və qidalara nəzarət etməyi məsləhət görür.
Kolumbiya Universitetinin mütəxəssisləri araşdırma nəticəsində qərara gəliblər ki, gecə yeməyi ürək və şəkər diabeti xəstəliklərinin yaranmasına səbəb olur.
Alimlər 12700 nəfər arasında araşdırma aparıblar. Bu adamlar 18-76 yaş arasında olan insanlar olub. Mütəmadi olaraq onların şəkəri, qan təzyiqi, qanda insulinin miqdarı ölçülüb. Eyni zamanda, onlara tapşırılıb ki, gündəlik nə yediklərini və saat neçədə yediklərini qeyd eləsinlər. Məlum olub ki, üzərində araşdırma aparılan şəxslərin yarıdan çoxu axşam saat 6-dan sonra gündəlik kalori normasının 30 faizini qəbul edir. Bu da onların analizində şəkərli diabet xəstəliyi riskinin daha yüksək olduğunu, eləcə də yüksək təzyiqdən əziyyət çəkdiklərini göstərib.
Alimlər gecə yeməyini qəti yeməməyi və qidalara nəzarət etməyi məsləhət görür.
Gecə vaxtı mübadilə prosesləri təbii olaraq ləngiyir, orqanizm dincəlir, bərpa olunur. Bu zaman qida qəbulu bu proseslərin pozulmasına səbəb olur. Bu isə öz növbəsində bəzi xəstəliklərin riskini artırır.
Mütəxəssislərin fikrincə, son qida qəbulu yatmazdan ən azı 2 saat əvvəl olmalıdır.
"Medical Plaza” klinikasının terapevt-qastroenteroloqu Sevindik Arazovun sözlərinə görə, meqapolis şəhərlərdə qida rejimi gözlənilmir. İnsanlar günün hansı saatında vaxt edirsə, o zaman da yeməyini yeyir. Rayonlarda və kəndlərdə qida rejiminə böyük şəhərlərə nisbətən daha çox əməl olunur. Səhər, günorta və axşam yeməkləri saatına uyğun yeyilir. Ancaq şəhər insanı bu rejimə riayət edə bilmir. Ailə arasında konkret yemək saatı müəyyənləşdirilsə də, toylar, qonaqlıqlar, dost məclisləri hamısı axşam saatlarında olur. Nəticədə də gecə yeməkləri qaçılmaz olur.
Kolumbiya Universitetinin mütəxəssisləri tərəfindən irəli sürülən iddiaların elmi məlumat yox, sadəcə bir araşdırma olduğunu vurğulayan qastroenteroloq deyib ki, son qida qəbulu yatmamışdan 3 saat əvvəl olmalıdır:
"Mədə şişib diafraqmanı qaldırdığı üçün gecə yeyəndə yatmaq olmur. Gecə yeməyinin insanda ağırlıq, narahatlıq yaratması halları var, amma hansısa riskli xəstəliklərə səbəb olduğunu mümkün hesab etmirəm. Əhalinin 15 faizi gecə növbəsində işləyir. Bəs onlar acıyanda neyləsin? Əsas odur ki, insanlar yediyi yeməyin tərkibinə diqqət yetirsinlər. Kalorisi çox olan, yağlı yeməkləri qarışdırmaq olmaz. Ən əsası isə yediyimizi yandırmalıyıq. Çox yeyib az hərəkət etmək insan sağlamlığı üçün təhlükəlidir. Gecə saat 3-də, 4-də yatan adamın 23:00-da yemək yeməsinin heç bir təhlükəsi yoxdur. Ancaq yeyib yatmaq məsləhətli deyil. Mütləq 2-3 saat fərq olmalıdır”.
Şəymən
