Dağlıq Qarabağ münaqişəsinin həlli istiqamətində danışıqların dondurulduğu bəyan edilsə də,
Azərbaycan və Ermənistan xarici işlər nazirlərinin növbəti görüşü planlaşdırılır. Azərbaycan
XİN rəhbəri Elmar Məmmədyarov dekabrın 8-9-da Almaniyanın Hamburq şəhərində keçiriləcək
toplantıda erməni həmkarı Edvard Nalbandyanla görüşəcəyini deyib.
E.Məmmədyarov Azərbaycan tərəfinin Hamburq görüşünə razılıq verdiyini bildirib. Bununla
belə, nazir əlavə edib ki, Ermənistan rəhbərliyi danışıqlar prosesini əngəlləməyə çalışır.
Hamburq görüşü haqqında ATƏT-in Minsk Qrupunun amerikalı həmsədri Ceyms Uorlik də
danışıb. Həmsədr vurğulayıb ki, vasitəçilər münaqişənin sülh yolu ilə həlli istiqamətində
tərəflərlə işi davam etdirir. Xatırladaq ki, Uorlik bir müddət əvvəl verdiyi açıqlamada
Azərbaycan və Ermənistan prezidentlərinin görüşünün hələ müəyyənləşmədiyini söyləmişdi.
Eyni zamanda, Ermənistan xarici işlər nazirinin müavini Şavarş Koçaryan ölkəsinin Qarabağ
danışıqlarını dayandırdığını bəyan etmişdi. Bu baxımdan xarici işlər nazirlərinin Hamburqda
nəzərdə tutulan görüşünün danışıqlar prosesinə təsir edib-etməyəcəyi maraqla gözlənilir.
Görüşlə bağlı "Şərq”ə açıqlama verən millət vəkili, ASDP sədri Araz Əlizadə Hamburqda hansısa müsbət nəticə əldə olunacağına inanmadığını deyib: "Dağlıq Qarabağ münaqişəsinin müharibədən başqa həll variantı yoxdur. Bu, mənim tam əminliklə dediyim və inandığım məsələdir. ATƏT-in Minsk
Qrupunun həmsədrləri onlara tapşırılan işi görməklə indiki status-kvonu saxlamağa çalışırlar. Bu
isə birbaşa düşmən tərəfə xeyir edir. Deməli, həmsədrlər ermənilərə işləyirlər”.
Millət vəkili Aydın Mirzəzadə isə bəyan edib ki, Almaniyanın Hamburq şəhərində baş tutacaqnövbəti görüş Azərbaycan üçün önəmlidir: "Görüşdə təkcə Azərbaycan-Ermənistan xarici işlər
nazirləri deyil, həm də ATƏT-in Minsk Qrupunun həmsədrləri iştirak edəcək. Görüş bizə imkan
verəcək ki, mövqeyimizi ortaya qoyaq. Ermənistan tərəfinin nəzərinə bir daha çatdıracağıq ki,Azərbaycan istənilən yolla problemi həll etmək əzmindədir. Ermənistanın pozuculuq siyasəti
ancaq özünün maraqlarına ziyan vuracaq. Prezidentlərin görüşünün baş tutub-tutmayacağı da bu
görüşdən sonra bəlli olacaq. Cənab Prezidentimiz dəfələrlə qeyd edib ki, görüş naminə görüşə
getmək fikrində deyil. Ermənistan tərəfindən sadəcə diplomatik görüşlərin keçirilməsi təklifi
olsa da, Azərbaycan bunu qəbuledilməz hesab edir. Xarci işlər nazirlərinin görüşündə mövqelər
bir daha aydınlaşdırılacaq. Əgər Ermənistan Azərbaycanın ərazi bütövlüyünə hörmət etmək
fikrində deyilsə, görüşə getməyin heç bir mənası yoxdur”.
İsmayıl
