"Həmsədrlər münaqişə tərəflərini cəbhə xəttində yaranmış gərginliyi azaltmağı və danışıqlar masasına qayıtmağı tövsiyə ediblər”
Azərbaycan xarici işlər naziri Elmar Məmmədyarov Münhendə ATƏT-in Minsk Qrupunun həmsədrləri, həmçinin, təşkilatın fəaliyyətdə olan sədrinin şəxsi nümayəndəsi Anjey Kasprşik ilə görüşüb.
Xarici İşlər Nazirliyinin mətbuat xidmətindən verilən məlumata görə, görüşdə Azərbaycan, Ermənistan və Rusiya prezidentlərinin Sankt-Peterburq görüşündəki müzakirələrinin davamı olaraq Dağlıq Qarabağ münaqişəsinin həlli üzrə danışıqlar prosesinin intensivləşdirilməsinə dair fikir mübadiləsi aparılıb. Nazir Elmar Məmmədyarov münaqişənin həlli prosesində irəliləyişə nail olmaq üçün səylərin artırılmasının vacibliyini vurğulayıb. Həmsədrlər xarici işlər nazirləri ilə görüşlərinin yekunu olaraq bəyanat yayıblar. Həmsədrlər münaqişənin dinc yolla həllinə alternativin olmadığını təsdiqləyərək, tərəfləri təmkinliyə, bəyanatlarında əhalini müharibəyə deyil, sülhə hazırlamağa çağırıblar: "Ermənistan və Azərbaycan daxil olmaqla, tərəflərdən heç biri Dağlıq Qarabağı müstəqil və suveren dövlət kimi tanımır. 20 fevral "referendumu”nun nəticələri Dağlıq Qarabağın hüquqi statusuna təsir edə bilməz”.
Münhen görüşünü və nəticələri "Şərq”ə şərh edən Qafqaz Beynəlxalq Münasibətlər və Strateji Araşdırmalar Mərkəzinin rəhbəri Araz Aslanlı deyib ki, Dağlıq Qarabağ münaqişəsinin həlli ilə bağlı keçirilən görüşlər müxtəlif mahiyyət daşıyır:
"Görüşlərin çox az qismi danışıqlar prosesində müəyyən qədər irəliləyişə nail olmaq, ümumi gedişata töhfə vermək məqsədi ilə təşkil edilir. Ancaq əksər görüşlər danışıqlar prosesində sadəcə vasitəçilik missiyasını həyata keçirmək üçün hazırlanır. Əlbəttə, XİN rəhbərləri səviyyəsində reallaşan bir toplantını tamamilə nəticəsiz saymaq doğru deyil. Nəzərə almaq lazımdır ki, Münhen görüşündə nazirlərlə yanaşı, həmsədrlər və ATƏT sədrinin şəxsi nümayəndəsi A.Kasprşik də iştirak ediblər, bəyanat veriblər.
Lakin bu görüşün hansısa nəticə verəcəyi gözlənilmir. Vasitəçilik xarakteri daşıyan Münhen görüşündə həmsədrlər münaqişə tərəflərini cəbhə xəttində yaranmış gərginliyi azaltmağı və danışıqlar masasına qayıtmağı tövsiyə ediblər. Həmsədrlər Azərbaycan və Ermənistan rəsmilərinin növbəti təmasına nail olmaq, xüsusən Prezidentlər səviyyəsində daha bir görüşü reallaşdırmaq üçün əlverişli siyasi mühit formalaşdırmağa çalışırlar”.
İsmayıl
