Millət vəkili Siyavuş Novruzov Milli Məclisin xərclər smetası ilə bağlı qanun layihəsinin müzakirəsi zamanı təkliflə çıxış edib. Deputat Milli Məclisdə sosioloji sorğu mərkəzinin yaradılmasına ehtiyac olduğunu deyib. Parlamentari əvvəllər belə bir şöbənin fəaliyyət göstərdiyini xatırladıb: "Prezident İlham Əliyev Milli Məclisin fəaliyyətini yüksək qiymətləndirir. Amma biz fəaliyyətimizə ictimaiyyətin münasibətini bilmirik. Heç olmasa, ayda bir dəfə həmin mərkəz tərəfindən sorğu keçirilməli, sorğular vasitəsilə ictimaiyyətin fikri öyrənilməlidir. Dünya təcrübəsində bütün parlamentlərdə bu cür mərkəzlər fəaliyyət göstərir, təhlillər həyata keçirilir”.
Deputatın təklifini "Şərq”ə şərh edən sosioloq-alim, professor Əhməd Qəşəmoğlu deyib ki, 1992-1997-ci illərdə Milli Məclisdə çox ciddi bir Elmi Mərkəz fəaliyyət göstərib:
"Mən də onun rəhbəri idim. Humanitar Tədqiqatlar və Proqnozlaşdırma Mərkəzi adlanan bu qurum qanunvericiliyin elmi əsaslarla qurulması sahəsində çox ciddi fəaliyyət göstərirdi. Biz həm də tez-tez sosioloji araşdırmalar aparır, hazırlanan qanunlar üçün mühüm məlumatlar əldə edir, eyni zamanda ölkədə gedən proseslər barədə obyektiv məlumatlar toplayırdıq. Siyavuş müəĺlimin də bu işlərdən xəbəri var idi. Təəssüf ki, 1997-ci ilin fevral ayında bu Mərkəz ləğv edildi. Hesab edirəm ki, belə bir mərkəzin yenidən təsis edilməsinə böyük ehtiyac var”.
İsmayıl
