ABŞ prezidentliyinə keçmiş namizəd, sabiq dövlət katibi Hillari Klinton 2020-ci ildə yenidən prezidentliyə namizədliyini irəli sürmək niyyətindədir. Bu barədə Klintonun sabiq müşaviri Mark Penn məlumat verib. Penn bildirib ki, "öz işinə və öz adına sadiq olan xanım Klinton sonunadək mübarizə aparacaq. O, əvvəlki seçkilərdə məğlubiyyət kimi "kiçik” bir uğursuzluğun onun Ağ Evə doğru yolunda maneəyə çevrilməsinə imkan verməyəcək.
Odur ki, xanım Klintonun iştirakı ilə yeni seçkiqabağı mübarizə gözləyin. Ola bilsin, o, bunu Senata seçilmiş demokratların çoxu kimi indi elan etməyəcək, amma daha sonra, ilkin səsverməyə qədər şəksiz edəcək”. Pennin sözlərinə görə, əvvəlki seçkiqabağı kampaniya zamanı hansı addımların yanlış olduğunu təhlil etmək və yeni strategiya hazırlamaq üçün Klintonun 2 il vaxtı olub. Klintonun özü prezident seçkilərinə qatılmaq planları barədə suala konkret cavab verməyib. O deyib ki, "seçkiqabağı mübarizə istəməzdi, amma prezident olmaq istərdi”. Məlumdur ki, indiki Prezident Donald Trampa qarşı Amerika ictimaiyyətində münasibət birmənalı deyil. Hətta sorğularda Trampın reytinqinin aşağı düşdüyü də bildirilir. Belə bir məqamda Klintonun ikinci şansının daha çox olacağı zənn edilir.
Klintonla bağlı yayılan söz-söhbətə münasibət bildirən politoloq Məhəmməd Əsədulluzadə "Şərq”ə bildirib ki, ABŞ-da Senata keçirilən seçkilərdə Demokratların nümayəndələr palatasında üstünlüyü əldə etməsi, 2020-ci ildəki prezident seçkilərində bu qüvvənin şansının kifayət qədər yüksək olacağını göstərir. Trampın reytinqi kifayət qədər aşağıdır və bundan sonrakı dönəmdə imicinin yüksələcəyi gözlənilmir.
Lakin xanım Klintonun 2020-ci il seçkilərində qalib gəlməsi problemli məsələdir. İnanmıram ki, ABŞ-ın "dərin dövləti” Klinton seçiminə müsbət yanaşsın. Ancaq Demokratlar Klintondan başqa namizəd irəli sürərsə, qalib gəlmək şansları yüksək olar. Çünki aralıq seçkilər Trampın mövqeyinin və gələcək şansının xeyli zəif olduğunu ortaya qoydu”.
İsmayıl
